โกกนุทสูตร

6. Kokanudasuttavaṇṇanā

Chaṭṭhe pubbāpayamānoti pubbasadisāni nirudakāni kurumāno. Kvettha āvusoti ko ettha āvuso. Yāvatā āvuso diṭṭhīti yattikā dvāsaṭṭhividhāpi diṭṭhi nāma atthi. Yāvatā diṭṭhiṭṭhānanti "khandhāpi diṭṭhiṭṭhānaṃ, avijjāpi, phassopi, saññāpi, vitakkopi, ayonisomanasikāropi, pāpamittopi, paratoghosopi diṭṭhiṭṭhānan"ti 2- evaṃ yattakaṃ aṭṭhavidhaṃ diṭṭhiṭṭhānaṃ diṭṭhikāraṇaṃ nāma atthi. Adhiṭṭhānanti diṭṭhādhiṭṭhānaṃ, 3- adhiṭhatvā 4- adhibhavitvā pavattāya diṭṭhiyā etaṃ nāmaṃ. Diṭṭhipariyuṭṭhānanti "katamāni aṭṭhārasa diṭṭhipariyuṭṭhānāni. Yā diṭṭhi diṭṭhigataṃ diṭṭhiggahanaṃ diṭṭhikantāraṃ diṭṭhivisūkaṃ diṭṭhivipphanditaṃ diṭṭhisaṃyojanaṃ diṭṭhisallaṃ diṭṭhisambādho diṭṭhipalibodho diṭṭhibandhanaṃ diṭṭhipapāto diṭṭhānusayo diṭṭhisantāpo diṭṭhipariḷāho diṭṭhigantho diṭṭhupādānaṃ diṭṭhābhiniveso diṭṭhiparāmāso. Imāni aṭṭhārasa diṭṭhipariyuṭṭhānānī"ti 5- evaṃ vuttadiṭṭhipariyuṭṭhānaṃ. Samuṭṭhānanti diṭṭhiṭṭhānasseva vevacanaṃ. Vuttañhetaṃ "khandhā paccayo diṭṭhīnaṃ upādāya samuṭṭhānaṭṭhenā"ti 6- sabbaṃ vitthāretabbaṃ. Sotāpattimaggo pana diṭṭhisamugghāto nāma sabbadiṭṭhīnaṃ samugghātakattā. Tamahanti taṃ sabbaṃ ahaṃ jānāmi. Kyāhaṃ vakkhāmīti kiṃkāraṇā ahaṃ vakkhāmi.

@Footnote: 1 cha.Ma. maggaṃ 2 khu.paṭi. 31/304/200 diṭṭhikathā (syā)

@3 cha.Ma. diṭṭhādhiṭṭhānanti diṭṭhīnaṃ adhiṭṭhānaṃ 4 Ma. adhitiṭṭhitvā

@5 khu. paṭi. 31/305/201 diṭṭhikathā (syā) 6 khu.paṭi. 31/304/200 diṭṭhikathā (syā)