กาลีสูตร

Ekaṃ samayaṃ āyasmā mahākaccāno avantīsu viharati kuraraghare pavatte pabbate . athakho kālī upāsikā kuraragharikā 1- yenāyasmā mahākaccāno tenupasaṅkami upasaṅkamitvā āyasmantaṃ mahākaccānaṃ abhivādetvā ekamantaṃ nisīdi ekamantaṃ nisinnā kho kālī upāsikā kuraragharikā āyasmantaṃ mahākaccānaṃ etadavoca vuttamidaṃ bhante bhagavatā kumārīpañhesu atthassa patti hadayassa santi jetvāna senaṃ piyasātarūpaṃ ekoha 2- jhāyī 3- sukhamānubodhiṃ tasmā janena na karomi sakkhiṃ sakkhī na sampajjati kenaci meti. Imassa nu kho bhante bhagavatā saṅkhittena bhāsitassa kathaṃ vitthārena attho daṭṭhabboti . paṭhavīkasiṇasamāpattiparamā kho bhagini eke samaṇabrāhmaṇā atthābhinibbattesuṃ yāvatā kho bhagini paṭhavīkasiṇasamāpattiparamatā @Footnote: 1 Po. Ma. kuragharikā . 2 Ma. Yu. ekohaṃ. Po. ekāhaṃ . 3 Ma. jhāyaṃ. Tadabhiññāsi bhagavā tadabhiññāya bhagavā ādimaddasa ādīnavamaddasa nissaraṇamaddasa maggāmaggañāṇadassanamaddasa tassa ādidassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti āpokasiṇasamāpattiparamā kho bhagini ... Tejokasiṇasamāpattiparamā kho bhagini ... Vāyokasiṇasamāpattiparamā kho bhagini ... Nīlakasiṇasamāpattiparamā kho bhagini ... Pītakasiṇasamāpattiparamā kho bhagini ... Lohitakasiṇasamāpattiparamā kho bhagini ... Odātakasiṇasamāpattiparamā kho bhagini ... Ākāsakasiṇasamāpattiparamā kho bhagini ... Viññāṇakasiṇasamāpattiparamā kho bhagini eke samaṇabrāhmaṇā atthābhinibbattesuṃ yāvatā kho bhagini viññāṇakasiṇasamāpattiparamatā tadabhiññāsi bhagavā tadabhiññāya bhagavā ādimaddasa ādīnavamaddasa nissaraṇamaddasa maggāmaggañāṇadassanamaddasa tassa ādidassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti iti kho bhagini yantaṃ vuttaṃ bhagavatā kumārīpañhesu atthassa patti hadayassa santi jetvāna senaṃ piyasātarūpaṃ ekoha jhāyī sukhamānubodhiṃ tasmā janena na karomi sakkhiṃ sakkhī na sampajjati kenaci meti. Imassa kho bhagini bhagavatā saṅkhittena bhāsitassa evaṃ vitthārena attho daṭṭhabboti.