สมาธิสูตร

6. Samādhisuttavaṇṇanā

Chaṭṭhe neva paṭhaviyaṃ paṭhavīsaññī assāti paṭhaviṃ ārammaṇaṃ katvā paṭhavīti evaṃ uppannāya saññāya saññī na bhaveyya. Āpādīsupi eseva nayo. Na idhaloketi idhaloke uppajjanakacatukkapañcakajjhānasaññāya na saññī bhaveyya. Na paraloketi paraloke uppajjanakacatukkapañcakajjhānasaññāya na saññī bhaveyya. Saññī ca pana assāti atha ca panassa samāpatti savitakkasamāpattiyeva assāti vuccati. Etaṃ santaṃ etaṃ paṇītanti santaṃ santanti appetvā nisinnassa divasaṃpi cittuppādo "santaṃ santan"tveva pavattati, paṇītaṃ paṇītanti appetvā nisinnassa divasaṃpi cittuppādo "paṇītaṃ paṇītan"tveva pavattati. Yadidaṃ sabbasaṅkhārasamathoti 1- sabbasaṅkhārasamatho sabbasaṅkhārasamathoti 1- nibbānaṃ nibbānanti appetvā nisinnassa divasaṃpi cittuppādo "nibbānaṃ nibbānan"tveva pavattīti. Sabbaṃ cetaṃ phalasamāpattisamādhiṃ sandhāya vuttaṃ.