7. Tissametteyyasuttavaṇṇanā

[821] Methunamanuyuttassāti tissametteyyasuttaṃ. Kā uppatti? bhagavati kira sāvatthiyaṃ viharante tissametteyyā nāma dve sahāyā sāvatthiṃ agamaṃsu. Te sāyanhasamayaṃ mahājanaṃ jetavanābhimukhaṃ gacchantaṃ disvā "kuhiṃ gacchathā"ti pucchiṃsu. Tato tehi "buddho loke uppanno, bahujanahitāya dhammaṃ deseti, taṃ sotuṃ jetavanaṃ gacchāmā"ti vutte "mayampi sossāmā"ti agamaṃsu. Te

@3 cha.Ma.,i. saṅkhaṃ 4 ka. kuhiṃ gatāti Avañjhadhamdesakassa bhagavato dhammadesanaṃ sutvā parisantare nisinnāva cintesuṃ "na sakkā agāramajjhe ṭhitenāyaṃ dhammo paripūretun"ti. Atha pakkante mahājane bhagavantaṃ pabbajjaṃ yāciṃsu, bhagavā "ime pabbājehī"ti aññataraṃ bhikkhuṃ āṇāpesi. So te pabbājetvā tacapañcakakammaṭṭhānaṃ datvā araññavāsaṃ gantumāraddho. Metteyyo tissaṃ āha "āvuso upajjhāyo araññaṃ gacchati, mayampi gacchāmā"ti. Tisso "alamāvuso, bhagavato dassanaṃ dhammassavanañcāhaṃ pihemi, gaccha tvan"ti vatvā na agamāsi. Metteyyo upajjhāyena saha gantvā araññe samaṇadhammaṃ karonto nacirasseva arahattaṃ pāpuṇi saddhiṃ ācariyupajjhāyehi. Tissassāpi jeṭṭhabhātā byādhinā kālamakāsi. So taṃ sutvā attano gāmaṃ agamāsi, tatra naṃ ñātakā palobhetvā uppabbājesuṃ. Metteyyopi ācariyupajjhāyehi saddhiṃ sāvatthimāgato. Atha bhagavā vutthavasso janapadacārikaṃ caramāno anupubbena taṃ gāmaṃ pāpuṇi. Atha metteyyo bhagavantaṃ vanditvā "imasmiṃ bhante gāme mama gihisahāyo atthi, muhuttaṃ tāva āgametha anukampaṃ upādāyā"ti vatvā gāmaṃ pavisitvā sahāyaṃ bhagavato santikaṃ ānetvā ekamantaṃ ṭhito tassatthāya ādigāthāya bhagavantaṃ pañhaṃ pucchi. Tassa bhagavā byākaronto avasesagāthāyo abhāsi. Ayamassa suttassa uppatti.