[1062] Uddhaṃ adho ca tiriyañcāpi majjheti ettha uddhanti anāgataddhā vuccati, adhoti atītaddhā, tiriyañcāpi majjheti paccuppannaddhā. Etesu nandiñca nivesanañca, panujja viññāṇanti etesu addhādīsu taṇhañca diṭṭhinivesanañca abhisaṅkhāraviññāṇañca panudehi, panuditvā ca bhave na tiṭṭhe, evaṃ sante duvidhepi bhave na tiṭṭheyya. Evaṃ tāva panujjasaddassa panudehīti imasmiṃ atthavikappe sambandho. Panuditvāti etasmiṃ pana atthavikappe bhave na tiṭṭheti ayameva sambandho, etāni nandinivesanaviññāṇāni panuditvā duvidhepi bhave na tiṭṭheyyāti vuttaṃ hoti.

[1063-4] Etāni vinodetvā bhave atiṭṭhanto eso:- evaṃvihārīti gāthā. Tattha idhevāti imasmiṃyeva sāsane, imasmiṃyeva vā attabhāve. Sukittikaṃ gotamanūpadhīkanti ettha anupadhikanti nibbānaṃ, taṃ sandhāya bhagavantaṃ ālapanto āha "sukittitaṃ gotamanūpadhīkan"ti.

[1065] Na kevalaṃ dukkhameva pahāsi:- te cāpīti gāthā. Tattha aṭṭhitanti sakkaccaṃ, ādaraṃ vā. Taṃ taṃ namassāmīti tasmā taṃ namassāmi. Sameccāti upagantvā. Nāgāti bhagavantaṃ ālapanto āha.