๑๐. เทวสภเถรคาถา

237. 10. (dutiya) devasabhattheragāthāvaṇṇanā

sammappadhānasampannoti āyasmato devasabhattherassa gāthā. Kā uppatti?

@Footnote: 1 Sī. saṃsāraṃ 2 Sī. vattamānaṃ 3 Sī. saṃsāragāmino

Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinanto sikhissa bhagavato kāle kulagehe nibbattitvā viññutaṃ patto ekadivasaṃ sikhiṃ bhagavantaṃ disvā pasannamānaso bandhujīvakapupphehi pūjaṃ akāsi. So tena puñña- kammena devamanussesu saṃsaranto imasmiṃ buddhuppāde kapilavatthusmiṃ sakyarājakule nibbatti, tassa devasabhoti nāmaṃ ahosi. So vayappatto cumbaṭakalahavūpasamanatthaṃ satthari āgate buddhānubhāvaṃ disvā pasannamānaso saraṇesu patiṭṭhito puna nigordhārāme satthari viharante satthāraṃ upasaṅkamitvā paṭiladdhasaddho pabbajitvā katapubbakicco vipassanāya kammaṃ karonto na cirasseva arahattaṃ pāpuṇi. Tena vuttaṃ apadāne 1- :-

"candaṃva vimalaṃ suddhaṃ vippasannamanāvilaṃ

nandirāgaparikkhīṇaṃ 2- tiṇṇaṃ loke visattikaṃ.

Nibbāpayantaṃ janataṃ tiṇṇaṃ tārayataṃ varaṃ

muniṃ vanamhi jhāyantaṃ ekaggaṃ susamāhitaṃ.

Bandhujīvakapupphāni lagitvā 3- suttakenahaṃ

buddhassa abhiropayiṃ sikhino lokabandhuno.

Ekatiṃse ito kappe yaṃ kammamakariṃ tadā

duggatiṃ nābhijānāmi buddhapūjāyidaṃ phalaṃ.

Ito sattamake kappe manujindo mahāyaso

samantacakkhunāmāsi cakkavattī mahabbalo.

Kilesā jhāpitā mayhaṃ .pe. Kataṃ buddhassa sāsanan"ti.

Arahattaṃ pana patvā attanā adhigataṃ vimuttisukhaṃ nissāya uppannapītisomanasso

@Footnote: 1 khu.apa. 32/1/240 bandhujīvakattherāpadāna 2 cha.Ma. nandībhavaparikkhīṇaṃ 3 cha.Ma. lagetvā Udānavasena:-

"sammappadhānasampanno satipaṭṭhānagocaro

vimuttikusumasañchanno parinibbissatyanāsavo"ti 1- gāthaṃ abhāsi.

Tattha sammappadhānasampannoti sampannacatubbidhasammappadhāno, tehi kattabba- kiccaṃ sampādetvā ṭhitoti attho. Satipaṭṭhānagocaroti kāyānupassanādayo satipaṭṭhānā gocaro pavattiṭṭhānaṃ etassāti satipaṭṭhānagocaro, catūsu satipaṭṭhānesu patiṭṭhitacittoti attho. Guṇasobhena paramasugandhā vimuttiyeva kusumāni, tehi sabbaso sammadeva sañchanno vibhūsito alaṅkatoti vimuttikusumasañchanno. Parinibbissatyanāsavoti evaṃ sammā paṭipajjanto bhikkhu na cirasseva anāsavo hutvā parinibbissati saupādisesāya anupādisesāya ca nibbānadhātuyāti attho. Idameva ca therassa aññābyākaraṇaṃ ahosi.

(dutiya) devasabhattheragāthāvaṇṇanā niṭṭhitā.

Paramatthadīpaniyā theragāthāsaṃvaṇṇanā

dasamavaggavaṇṇanā niṭṭhitā.

@Footnote: 1 pāli., Sī. parinibbāyissatyanāsavoti