๑๖. สุมนวุฐฒปัพพชิตาเถรีคาถา

417. 16. Vuḍḍhapabbajitasumanātherīgāthāvaṇṇanā

sukhaṃ tvaṃ vuḍḍhike sehītiādikā sumanāya vuḍḍhapabbajitāya gāthā.

Ayampi purimabuddhesu katādhikārā tattha tattha bhave kusalaṃ upacinitvā imasmiṃ buddhuppāde sāvatthiyaṃ mahākosalarañño bhaginī hutvā nibbatti. Sā satthārā rañño pasenadikosalassa "cattāro kho me mahārāja daharāti na uññātabbā"ti- ādinā 1- desitaṃ dhammaṃ sutvā laddhapasādā saraṇesu ca sīlesu ca patiṭṭhāya pabbajitu- kāmāpi "ayyikaṃ paṭijaggissāmī"ti ciraṃ kālaṃ vītināmetvā aparabhāge ayyikāya kālakatāya raññā saddhiṃ mahagghāni attharaṇāni pāvuraṇāni gāhāpetvā vihāraṃ gantvā saṃghassa dāpetvā satthu santike dhammaṃ sutvā anāgāmiphale patiṭṭhitā pabbajjaṃ yāci. Satthā tassā ñāṇaparipākaṃ disvā:-

"sukhaṃ tvaṃ vuḍḍhike sehi katvā coḷena pārutā

upasanto hi te rāgo sītibhūtāsi nibbutā"ti imaṃ gāthaṃ abhāsi. Sā gāthāpariyosāne saha paṭisambhidāhi arahattaṃ patvā udāna- vasena tameva gāthaṃ abhāsi. Idameva cassā aññābyākaraṇaṃ ahosi, sā tāvadeva pabbaji. Gāthāya pana vuḍḍhiketi vuḍḍhe, vayovuḍḍheti attho. Ayaṃ pana sīlādi- guṇehipi vuḍḍhā, theriyā vuttagāthāya catutthapāde sītibhūtāsi nibbutāti yojetabbaṃ. Sesaṃ vuttanayameva.

Vuḍḍhapabbajitasumanātherīgāthāvaṇṇanā niṭṭhitā.

@Footnote: 1 saṃ.sa. 15/112/83