๑๘. สังฆาเถรีคาถา

๔๑๙. ๑๘. สํฆาเถรีคาถาวณฺณนา

หิตฺวา ฆเร ปพฺพชิตฺวาติอาทิกา สํฆาย เถริยา คาถา.

ตสฺสา วตฺถุ ธีราเถริยา วตฺถุสทิสํ. ๑- สา ปน อรหตฺตํ ปตฺตา ๑-:-

"หิตฺวา ฆเร ปพฺพชิตฺวา หิตฺวา ปุตฺตํ ปสุํ ปิยํ

หิตฺวา ราคญฺจ โทสญฺจ อวิชฺชญฺจ วิราชิย

สมูลํ ตณฺหมพฺพุยฺห อุปสนฺตามฺหิ นิพฺพุตา"ติ คาถํ อภาสิ.

ตตฺถ หิตฺวาติ ฉฑฺเฑตฺวา. ฆเรติ เคหํ. ฆรสทฺโท หิ เอกสฺมิมฺปิ อภิเธยฺเย กทาจิ พหูสุ พีชํ วิย รุฬฺหิวเสน โวหรียติ. หิตฺวา ปุตฺตํ ปสุํ ปิยนฺติ ปิยายิตพฺเพ ปุตฺเต เจว โคมหิสาทิเก ปสู จ ตปฺปฏิพทฺธฉนฺทราคปฺปหาเนน ปหาย. หิตฺวา ราคญฺจ โทสญฺจาติ รชฺชนสภาวํ ราคํ ทุสฺสนสภาวํ โทสญฺจ อริยมคฺเคน สมุจฺฉินฺทิตฺวา. อวิชฺชญฺจ วิราชิยาติ สพฺพากุสเลสุ ปุพฺพงฺคมํ โมหญฺจ วิราชิตฺวา มคฺเคน สมุคฺฆาเฏตฺวา อิจฺเจวมตฺโถ. เสสํ วุตฺตนยเมว.

สํฆาเถรีคาถาวณฺณนา นิฏฺฐิตา.

เอกกนิปาตวณฺณนา นิฏฺฐิตา.

@เชิงอรรถ: ๑-๑ ฉ.ม. คาถา ปน