๓. มณิถูณวิมาน

77. 3. Maṇithūṇavimānavaṇṇanā

uccamidaṃ maṇithūṇaṃ vimānanti maṇithūṇavimānaṃ. Tassa kā uppatti? bhagavā sāvatthiyaṃ viharati jetavane. Tena samayena sambahulā therā bhikkhū araññāyatane viharanti. Tesaṃ 1- gāmaṃ piṇḍāya gamanamagge eko upāsako visamaṃ samaṃ karoti, kaṇṭake nīharati, gacchagumbe apaneti, udakakāle mātikāsu setuṃ bandhati, vivanaṭṭhānesu chāyārukkhe ropeti, jalāsayesu mattikaṃ uddharitvā te puthulagambhīre karoti, titthe sampādeti, yathāvibhavaṃ dānaṃ deti, sīlaṃ 2- rakkhati. So aparabhāge kālaṃ katvā tāvatiṃsesu dvādasayojanikā kanakavimāne nibbatti. Taṃ āyasmā mahāmoggallānat- thero upasaṅkamitvā imāhi gāthāhi paṭipucchi:-

"uccamidaṃ maṇithūṇaṃ vimānaṃ

samantato dvādasa yojanāni

kūṭāgārā sattasatā uḷārā

veḷuriyathambhā rucakatthatā subhā.

Tatthacchasi pivasi khādasi ca

dibbā ca vīṇā pavadanti vagguṃ

@Footnote: 1 ka. tesaṃ samīpaṃ 2 Sī. sīlāni

Dibbā rasā kāmaguṇettha pañca

nāriyo ca naccanti suvaṇṇachannā.

Kena te'tādiso vaṇṇo kena te idha mijjhati

uppajjanti ca te bhogā ye keci manaso piyā.

Pucchāmi taṃ deva mahānubhāva

manussabhūto kimakāsi puññaṃ

kenāsi evañjalitānubhāvo

vaṇṇo ca te sabbadisā pabhāsatī"ti. Sopi tassa gāthāhi byākāsi:-

"so devaputto attamano .pe. Yassa kammassidaṃ phalaṃ.

"ahaṃ manussesu manussabhūto

vivane pathe saṅkamanaṃ 1- akāsiṃ

ārāmarukkhāni ca ropayissaṃ

piyā ca me sīlavanto ahesuṃ

annañca pānañca pasannacitto

sakkacca dānaṃ vipulaṃ adāsiṃ.

Tena me'tādiso vaṇṇo .pe.

Vaṇṇo ca me sabbadisā pabhāsatī"ti.

@Footnote: 1 Sī.,ka. caṅkamanaṃ

Tattha vivaneti araññe. Ārāmarukkhāni cāti ārāmabhūte rukkhe, ārāmaṃ katvā tattha rukkhe ropesinti attho. Sesaṃ sabbaṃ vuttanayameva.

Maṇithūṇavimānavaṇṇanā niṭṭhitā.