[๑๙๐] "กึ นุ ชาตึ น โรเจสิ ชาโต กามานิ ภุญฺชติ

ภุญฺชาหิ กามรติโย มาหุ ปจฺฉานุตาปินี"ติ คาถมาห.

ตสฺสตฺโถ:- กึ นุ ตํ การณํ, เยน ตฺวํ อุปจาเล ชาตึ น โรเจสิ น โรเจยฺยาสิ, น ตํ การณํ อตฺถิ. ยสฺมา ชาโต กามานิ ภุญฺชติ อิธ ชาโต กามคุณสํหิตานิ รูปาทีนิ ปฏิเสวนฺโต กามสุขํ ปริภุญฺชติ. น หิ อชาตสฺส ตํ อตฺถิ, ตสฺมา ภุญฺชาหิ กามรติโย กามขิฑฺฑารติโย อนุภว. มาหุ ปจฺฉานุตาปินี "โยพฺพญฺเญ สติ วิชฺชมาเนสุ โภเคสุ น มยา กามสุขมนุภูตนฺ"ติ ปจฺฉานุตาปินี มา อโหสิ, อิมสฺมึ โลเก ธมฺมา นาม ยาวเทว อตฺถาธิคมตฺโถ ๒- อตฺโถ จ กาม- สุขตฺโถติ ปากโฏยมตฺโถติ อธิปฺปาโย.

ตํ สุตฺวา เถรี ชาติยา ทุกฺขนิมิตฺตตํ อตฺตโน จ ตสฺส วิสยาติกฺกมํ วิภาเวตฺวา ตชฺเชนฺตี:-