4. Catutthavagga

288. 1. Migasirattheragāthāvaṇṇanā

yato ahaṃ pabbajitoti āyasmato migasirattherassa gāthā. Kā uppatti?

ayampi purimabuddhesu katādhikāro tattha tattha bhave puññāni upacinanto kassapassa bhagavato kāle brāhmaṇakule nibbattitvā viññutaṃ patto ekadivasaṃ satthāraṃ disvā pasannacitto kusaṭṭhakaṃ adāsi. So tena puññakammena devamanussesu saṃsaranto imasmiṃ buddhuppāde kosalaraṭṭhe brāhmaṇakule paṭisandhiṃ gahetvā migasiranakkhatte jātattā migasiroti laddhanāmo vayappatto brāhmaṇānaṃ vijjāsippesu nipphattiṃ gato chavasīsamantaṃ nāma sikkhi, yaṃ parijapetvā tivassamatthake matānampi sīsaṃ nakhena ākoṭetvā "ayaṃ satto asukaṭṭhāne nibbatto"ti jānāti.