Arahattaṃ pana patvā bhagavantaṃ vanditvā sāvatthiṃ agamāsi. Tassa āgatabhāvaṃ sutvā ñātakā upagantvā mahādānaṃ pavattesuṃ. So katipayadivase vasitvā araññameva gantukāmo ahosi. Taṃ ñātakā "bhante araññaṃ nāma ḍaṃsamakasādivasena bahuparissayaṃ, idheva vasathā"ti āhaṃsu. Taṃ sutvā thero "araññavāsoyeva mayhaṃ ruccatī"ti vivekābhiratikittanamukhena aññaṃ byākaronto:-

2- "phuṭṭho ḍaṃsehi makasehi araññasmiṃ brahāvane

nāgo saṅgāmasīseva sato tatrādhivāsaye"ti gāthaṃ abhāsi.

[31] Tattha phuṭṭho ḍaṃsehi makasehīti ḍaṃsanasīlatāya "ḍaṃsā"ti laddhanāmāhi andhakamakkhikāhi, makasasaññitehi ca sūcimukhapāṇehi phussito daṭṭhoti attho. Araññasminti "pañcadhanusatikaṃ pacchiman"ti vuttaaraññalakkhaṇayogato araññe. Brahāvaneti mahārukkhagacchagahanatāya mahāvane araññāniyaṃ. Nāgo saṅgāmasīsevāti saṅgāmāvacaro hatthināgo viya saṅgāmuddhani parasenāsampahāraṃ. "araññavāso nāma buddhādīhi vaṇṇito thomito"ti ussāhajāto sato satimā hutvā tatra tasmiṃ araññe, tasmiṃ vā ḍaṃsādisamphasse upaṭṭhite adhivāsaye adhivāseyya saheyya, "ḍaṃsādayo maṃ ābādhentī"ti araññavāsaṃ na jaheyyāti attho.