"idheva bhikkhave samaṇo, idha dutiyo samaṇo, idha tatiyo samaṇo,

idha catuttho samaṇo, suññā parappavādā samaṇehi aññehī"ti.

Itīti evaṃ. Assūti nipātamattaṃ. Saṃghanti bhikkhusaṃghaṃ, ukkaṭṭhaniddesoyaṃ yathā "satthā devamanussānan"ti. Saṃghanti vā samūhaṃ, veneyyajananti adhippāyo. Bhagavāti bhāgyavantatādīhi kāraṇehi bhagavā, ayamettha saṅkhePo. Vitthāro pana paramatthadīpaniyaṃ itivuttakavaṇṇanāyaṃ vuttanayena veditabbo. Satthāti diṭṭhadhammikasamparāyikaparamatthehi yathārahaṃ anusāsatīti satthā. Sayanti sayameva. Ayañhettha attho:- "sīlādikhandhattayasaṅgaho sammādiṭṭhiādīnaṃ aṭṭhannaṃ aṅgānaṃ vasena aṭṭhaṅgiko nibbānagāmī ariyamaggo yathā mama sāsane atthi, evaṃ bāhirakasamaye maggo nāma natthī"ti