Tattha paṇṇavīsativassāni, yato pabbajito ahanti yato paṭṭhāya ahaṃ pabbajito tānimāni paṇṇavīsativassāni. Accharāsaṅghātamattampi, cetosantimanajjhaganti sohaṃ ettakaṃ kālaṃ brahamcariyaṃ caranto accharāsaṅghātamattampi aṅguliphoṭanamattampi khaṇaṃ cetosantiṃ cetaso samādhānaṃ na labhiṃ.

Evaṃ pana aladdhā cittassekaggataṃ, tattha kāraṇamāha "kāmarāgena addito"ti. Tattha additoti pīḷito, abhibhūtoti attho. Bāhā paggayha kandantoti "idamidha ativiya ayuttaṃ vattati, yadāhaṃ niyyānike sāsane pabbajitvā attānaṃ kilesapaṅkato uddharituṃ na sakkomī"ti uddhaṃmukho bāhā paggayha kandamāno. Vihārā upanikkhaminti vasanakavihārato bahi nikkhanto.

Yenādhippāyena nikkhanto, taṃ dassetuṃ "satthaṃ vā āharissāmī"tiādi vuttaṃ. Tattha satthaṃ vā āharissāmīti vāsaddo vikappanattho. Tena "rukkhā vā papatissāmi, ubbandhitvā vā marissāmī"tiādike maraṇappakāre saṅgaṇhāti. Sikkhanti adhisīlasikkhaṃ. Paccakkhanti paccācikkhanto pariccajanto. "paccakkhā"tipi pāli, paccakkhāyāti attho. Kālanti maraṇaṃ, kathaṃ hi nāma mādiso sikkhāpaccakkhānena kālaṃ kareyyāti attho. Sikkhāpaccakkhānaṃ hi ariyassa vinaye maraṇaṃ nāma. Yathāha bhagavā "maraṇaṃ hetaṃ bhikkhave yo sikkhaṃ paccakkhāya hīnāyāvattatī"ti. "sikkhaṃ paccak- khā"ti pana pāṭhe kathaṃ hi nāma mādiso sikkhaṃ paccakkhāya kālaṃ kareyya, sikkhāsamaṅgī eva pana hutvā kālaṃ kareyya, tasmā satthaṃ vā āharissāmi, ko attho jīvitena meti yojanā.