363. 3. Bhaddattheragāthāvaṇṇanā

ekaputtotiādikā āyasmato bhaddattherassa gāthā. Kā uppatti?

ayaṃ kira padumuttaraṃ bhagavantaṃ bhikkhusaṃghañca satasahassaparimāṇaṃ cīvarādīhi catūhi paccayehi pūjesi. So tena puññakammena devamanussesu saṃsaranto imasmiṃ buddhuppāde sāvatthiyaṃ seṭṭhikule nibbatti, nibbattamāno ca aputtakesu mātāpitūsu devatāyācanādīni katvāpi alabhantesu satthāraṃ upasaṅkamitvā "sace bhante mayaṃ ekaṃ puttaṃ lacchāma, taṃ tumhākaṃ dāsatthāya dassāmā"ti vatvā āyācitvā gatesu satthu adhippāyaṃ ñatvā aññataro devaputto khīṇāyuko hutvā ṭhito sakkena devaraññā "amukasmiṃ kule nibbattāhī"ti āṇatto tattha nibbatti, bhaddotissa nāmaṃ akaṃsu. Taṃ sattavassuddesikaṃ jātaṃ mātāpitaro alaṅkaritvā bhagavato santikaṃ netvā "ayaṃ so bhante tumhe āyācitvā laddhadārako, imaṃ tumhākaṃ niyyātemā"ti āhaṃsu. Satthā ānandattheraṃ āṇāpesi "imaṃ pabbājehī"ti. Āṇāpetvā ca gandhakuṭiṃ pāvisi. Thero taṃ pabbājetvā saṅkhepena vipassanāmukhaṃ ācikkhi, so upanissayasampannattā vipassanāya kammaṃ karonto suriye anoggateyeva bhāvanaṃ ussukkāpetvā chaḷabhiñño ahosi. Tena vuttaṃ apadāne 3-:-

"padumuttarasambuddhaṃ mettacittaṃ mahāmuniṃ