"atha vā samādhilābhena vivittasayanena vā

bhikkhu vissāsamāpādi appatto āsavakkhayan"ti.

Tena vuttaṃ "viriyasātaccasampanno"tiādi. Satatabhāvo sātaccaṃ, viriyassa sātaccaṃ, tena sampanno samannāgato, satatapavattaviriyo, niccapaggahitaviriyoti attho. Yuttayogo sadā siyāti sabbakālaṃ bhāvanānuyutto siyā. Dukkhantanti vaṭṭadukkhassa antaṃ pariyosānaṃ nirodhaṃ nibbānaṃ appatvā vissāsaṃ na eyya na gaccheyya, "ahaṃ parisuddhasīlo jhānalābhī abhiññālābhī vipassanaṃ matthakaṃ pāpetvā ṭhito"ti vā vissaṭṭho na bhaveyyāti attho.