๗. นามสิทธิชาดก

๗. นามสิทฺธิชาตกํ

ชีวกญฺจ มตํ ทิสฺวาติ อิทํ สตฺถา เชตวเน วิหรนฺโต เอกํ นามสิทฺธิกํ ภิกฺขุํ อารพฺภ กเถสิ ฯ

เอโก กิร กุลปุตฺโต นาเมน ปาปโก นาม สาสเน อุรํ ทตฺวา ปพฺพชิโต ภิกฺขูหิ เอหาวุโส ปาปก ติฏฺฐาวุโส ปาปกาติ วุจฺจมาโน จินฺเตสิ โลเก ปาปกํ นาม ลามกํ กาฬกณฺณิภูตนฺติ วุจฺจติ อญฺญํ มงฺคลปฺปฏิสํยุตฺตํ นามํ อาหราเปสฺสามีติ ฯ โส อาจริยุปชฺฌาเย อุปสงฺกมิตฺวา ภนฺเต มยฺหํ นามํ อวมงฺคลํ อญฺญํ เม นามํ กโรถาติ อาห ฯ อถ นํ เต เอวมาหํสุ อาวุโส นามํ นามปณฺณตฺติมตฺตํ นาเมน กาจิ อตฺถสิทฺธิ นาม นตฺถิ อตฺตโน นาเมเนว สนฺตุฏฺโฐ โหหีติ ฯ โส ปุนปฺปุนํ ยาจิเยว ฯ ตสฺสายํ นามสิทฺธิกภาโว สงฺเฆ ปากโฏ ชาโต ฯ อเถกทิวสํ ธมฺมสภายํ สนฺนิสินฺนา ภิกฺขู กถํ สมุฏฺฐาเปสุํ อาวุโส อสุโก กิร ภิกฺขุ นามสิทฺธิโก มงฺคลนามํ อาหราเปตีติ ฯ สตฺถา ธมฺมสภํ อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ โส นามสิทฺธิโกเยวาติ วตฺวา อตีตํ อาหริ ฯ

อตีเต ตกฺกสิลายํ โพธิสตฺโต ทิสาปาโมกฺโข อาจริโย หุตฺวา ปญฺจ มาณวกสตานิ มนฺเต วาเจสิ ฯ ตสฺเสโก มาณโว ปาปโก นาม นาเมน ฯ โส เอหิ ปาปก ยาหิ ปาปกาติ วุจฺจมาโน จินฺเตตฺวา มยฺหํ นามํ อวมงฺคลํ อญฺญํ นามํ เม อาหราเปสฺสามีติ อาจริยํ อุปสงฺกมิตฺวา อาจริย มยฺหํ นามํ อวมงฺคลํ อญฺญํ นามํ กโรถาติ อาห ฯ อถ นํ อาจริโย อโวจ คจฺฉ ตาต ชนปทจาริกํ จริตฺวา อตฺตโน อภิรุจิตํ เอกํ มงฺคลนามํ คเหตฺวา เอหิ อาคตสฺส เต นามํ ปริวตฺเตตฺวา อญฺญํ นามํ กริสฺสามีติ ฯ โส สาธูติ ปาเถยฺยํ คเหตฺวา นิกฺขนฺโต คาเมน คามํ จรนฺโต เอกํ นครํ ปาปุณิ ฯ ตตฺเถเวโก ปุริโส กาลกโต ชีวโก นาม นาเมน ฯ โส ตํ ญาติชเนน อาฬาหนํ นียมานํ ทิสฺวา กินฺนาม นาเมส ปุริโสติ ปุจฺฉิ ฯ ชีวโก นามาติ ฯ ชีวโกปิ มรตีติ ฯ ชีวโกปิ อชีวโกปิ มรติ นามํ นามปณฺณตฺติมตฺตํ ตฺวญฺจ พาโล มญฺเญติ ฯ โส ตํ กถํ สุตฺวา นาเม มชฺฌตฺโต หุตฺวา อตฺตโน นครํ ปาวิสิ ฯ อเถกํ ทาสึ ภตึ อททมานํ สามิกา ทฺวาเร นิสีทาเปตฺวา รชฺชุยา ปหรนฺติ ฯ ตสฺสา จ ธนปาลีติ นามํ โหติ ฯ โส อนฺตรวีถิยา คจฺฉนฺโต ตํ โปถิยมานํ ทิสฺวา กสฺมา อิมํ โปเถถาติ ปุจฺฉิ ฯ ภตึ ทาตุํ น สกฺโกตีติ ฯ กึ ปนสฺสา นามนฺติ ฯ ธนปาลี นามาติ ฯ นาเมน ธนปาลีนามาปิ ภติมตฺตํ ทาตุํ น สกฺโกตีติ ฯ ธนปาลิโยปิ อธนปาลิโยปิ ทุคฺคตา โหนฺติ นามํ นามปณฺณตฺติมตฺตํ ตฺวํ พาโล มญฺเญติ ฯ โส นาเม มชฺฌตฺตตโร หุตฺวา นครา นิกฺขมฺม มคฺคํ ปฏิปนฺโน อนฺตรามคฺเค มคฺคมูฬฺหํ ปุริสํ ทิสฺวา อยฺโย กึ กโรนฺโต จรสีติ ปุจฺฉิ ฯ มคฺคมูฬฺโหมฺหิ สามีติ ฯ กึ ปน เต นามนฺติ ฯ ปนฺถโก นามาติ ฯ ปนฺถโกปิ มคฺคมูฬฺโห โหตีติ ฯ ปนฺถโกปิ อปนฺถโกปิ มคฺคมูฬฺโห โหติ นามํ นามปณฺณตฺติมตฺตํ ตฺวํ ปน พาโล มญฺเญติ ฯ โส นาเม อติมชฺฌตฺโต หุตฺวา โพธิสตฺตสฺส สนฺติกํ คนฺตฺวา กึ ตาต นามํ โรเจตฺวา อาคโตสีติ วุตฺเต อาจริย ชีวกาปิ นาม มรนฺติ อชีวกาปิ ธนปาลิโยปิ ทุคฺคตา โหนฺติ ธนปาลิโยปิ ปนฺถกาปิ มคฺคมูฬฺหา โหนฺติ อปนฺถกาปิ นามํ นามปณฺณตฺติมตฺตํ นาเมน สิทฺธิ นตฺถิ กมฺเมเนว สิทฺธิ อลํ ยฺหํ อญฺเญน นาเมน ตเทว เม นามํ โหตูติ อาห ฯ โพธิสตฺโต น ทิฏฺฐญฺจ กตญฺจ สํสนฺเทตฺวา อิมํ คาถมาห

ชีวกญฺจ มตํ ทิสฺวา ธนปาลิญฺจ ทุคฺคตํ

ปนฺถกญฺจ วเน มูฬฺหํ ปาปโก ปุนราคโตติ ฯ

ตตฺถ ปุนราคโตติ อิมานิ ตีณิ การณานิ ทิสฺวา ปุน อาคโต ฯ รกาโร สนฺธิวเสน วุตฺโต ฯ

สตฺถา อิมํ อตีตํ อาหริตฺวา น ภิกฺขเว อิทาเนว ปุพฺเพเปส นามสิทฺธิโกเยวาติ วตฺวา ชาตกํ สโมธาเนสิ ตทา นามสิทฺธิโก อิทานิปิ นามสิทฺธิโกเยว อาจริยปริสา พุทฺธปริสา อาจริโย ปน อหเมวาติ

นามสิทฺธิชาตกํ สตฺตมํ ฯ