๔. มิตตวินทชาดก

๔ มิตฺตวินฺทชาตกํ

จตุพฺภิ อฏฺฐชฺฌคมาติ อิทํ สตฺถา เชตวเน วิหรนฺโต เอก ทุพฺพจภิกฺขุํ อารพฺภ กเถสิ ฯ

วตฺถุํ เหฏฺฐา มิตฺตวินฺทชาตเก วุตฺตนเยเนว วิตฺถาเรตพฺพํ อิทํ ปน ชาตกํ กสฺสปพุทฺธกาลิกํ ฯ ตสฺมึ หิ กาเล อุรจกฺ อุกฺขิปิตฺวา นิรเย ปจฺจมาโน เอโก เนรยิกสตฺโต ภนฺเต กึ นุ โข ปาปกํ อกาสินฺติ โพธิสตฺตํ ปุจฺฉิ ฯ โพธิสตฺโต ตยา อิทญฺจิทญฺ ปาปกมฺมํ กตนฺติ วตฺวา อิมํ คาถมาห

จตุพฺภิ อฏฺฐชฺฌคมา อฏฺฐาภิปิ จ โสฬส

โสฬสาภิ จ พตฺตึส อตฺริจฺฉํ จกฺกมาสโท

อิจฺฉาหตสฺส โปสสฺส จกฺกํ ภมติ มตฺถเกติ ฯ

ตตฺถ จตุพฺภิ อฏฺฐชฺฌคมาติ สมุทฺทนฺตเร จตสฺโส วิมานเปติโย ลภิตฺวา ตาหิ อสนฺตุฏฺโฐ อตฺริจฺฉตาย ปุรโต คนฺตฺวา อปรา อฏฺฐปิ อธิคโตสีติ อตฺโถ ฯ เสสปททฺวเยปิ เอเสว นโย ฯ อตฺริจฺฉํ จกฺกมาสโทติ เอวํ สกลาเภน อสนฺตุฏฺโฐ อตฺริจฺฉํ อตฺร อตฺร อิจฺฉนฺโต ปุรโต ลาภํ ปฏฺเฐนฺโต อิทานิ จกฺกมาสโท อิทํ อุรจกฺกํ ปตฺโตสิ ตสฺส เต เอวํ อิจฺฉาหตสฺส โปสสฺส ตณฺหาย หตสฺส อุปหตสฺส ตว จกฺกํ ภมติ มตฺถเก ปาสาณจกฺกํ อยจกฺกนฺติ อิเมสุ ทฺวีสุ ขุรธารํ อยจกฺกํ ตสฺส มตฺถเก ปุนปฺปุนํ ปวตฺตนวเสน ภมนฺตํ ทิสฺวา เอวมาห ฯ

วตฺวา จ ปน อตฺตโน เทวโลกเมว คโต ฯ โสปิ เนรยิกสตฺโต อตฺตโน ปาเป ขีเณ ยถากมฺมํ คโต ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา มิตฺตวินฺทโก ทุพฺพจภิกฺขุ อโหสิ เทวปุตฺโต ปน อหเมวาติ ฯ

มิตฺตวินฺทชาตกํ จตุตฺถํ ฯ