๔. มิตจินติชาดก

๔ มิตจินฺติชาตกํ

พหุจินฺตี อปฺปจินฺตี จาติ อิทํ สตฺถา เชตวเน วิหรนฺโต เทฺว มหลฺลกตฺเถเร อารพฺภ กเถสิ ฯ

เต กิร ชนปเท เอกสฺมึ อรญฺญวาเส วสฺสํ วสิตฺวา สตฺถุ ทสฺสนตฺถาย คจฺฉิสฺสามาติ ปาเถยฺยํ สชฺเชตฺวา อชฺช คจฺฉาม เสฺว คจฺฉามาติ มาสํ อติกฺกมิตฺวา ปุน ปาเถยฺยํ สชฺเชตฺวา ตเถว มาสํ ปุน มาสนฺติ เอวํ อตฺตโน กุสีตภาเวน เจว นิวาสนฏฺฐาเน จ สาเปกฺขาย ตโย มาเส อติกฺกมิตฺวา ตโต นิกฺขมฺม เชตวนํ คนฺตฺวา สภาคฏฺฐาเน ปตฺตจีวรํ ปฏิสาเมตฺวา สตฺถารํ ปสฺสึสุ ฯ อถ นํ ภิกฺขู ปุจฺฉึสุ สุจิรํ โว อาวุโส พุทฺธุปฏฺฐานํ อกโรนฺตานํ กสฺมา เอวํ จิรายิตฺถาติ ฯ เต เอตมตฺถํ อาโรเจสุํ ฯ อถ เนสํ โส อาลสิยกุสีตภาโว สงฺเฆ ปากโฏ ชาโต ฯ ธมฺมสภายมฺปิ เนสํ ภิกฺขู ตเมว อาลสิยภาวํ นิสฺสาย กถํ สมุฏฺฐาเปสุํ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต เต ปกฺโกสาเปตฺวา สจฺจํ กิร ตุมฺเห ภิกฺขเว อลสา กุสีตาติ ปุจฺฉิตฺวา สจฺจํ ภนฺเตติ วุตฺเต น ภิกฺขเว อิทาเนว เต อลสา ปุพฺเพปิ อลสา เจว นิวาสนฏฺฐาเน จ สาลยา สาเปกฺขาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต พาราณสิยํ ตโย มจฺฉา อเหสุํ ฯ พหุจินฺตี อปฺปจินฺตี มิตจินฺตีติ เตสํ นามานิ ฯ เต อรญฺญโต มนุสฺสปถํ อาคมึสุ ฯ ตตฺถ มิตจนฺตี อิตเร เทฺว เอวมาห อยํ มนุสฺสปโถ นาม สาสงฺโก สปฺปฏิภโย เกวฏฺฏา นานปฺปการานิ ชาลกุมินาทีนิ ขิปิตฺวา มจฺเฉ คณฺหนฺติ มยํ อรญฺญเมว คจฺฉามาติ ฯ อิตเร เทฺว ชนา อลสตาย เจว อามิสคิทฺธตาย จ อชฺช คจฺฉาม เสฺว คจฺฉามาติ ตโย มาเส อติกฺกาเมสุํ ฯ อถ เกวฏฺฏา นทิยํ ชาเล ขิปึสุ ฯ พหุจินฺตี อปฺปจินฺตี จ โคจรํ คณฺหนฺตา ปุรโต คจฺฉนฺติ เต อตฺตโน พาลตาย ชาลคนฺธํ อสลฺลกฺเขตฺวา ชาลกุจฺฉิเมว ปวิสึสุ ฯ มิตจินฺตี ปจฺฉโต อาคจฺฉนฺโต ชาลคนฺธํ สลฺลกฺเขตฺวา เตสญฺจ ชาลกุจฺฉิสฺมึ ปวิฏฺฐภาวํ ญตฺวา อิเมสํ กุสีตานํ อนฺธพาลานํ ชีวิตทานํ ทสฺสามีติ จินฺเตตฺวา พหิปสฺเสน ชาลกุจฺฉิฏฺฐานํ คนฺตฺวา ชาลกุจฺฉึ ผาเลตฺวา นิกฺขนฺตสทิโส หุตฺวา อุทกํ อาโลเฬนฺโต ชาลสฺส ปุรโต ปติตฺวา ปุน ชาลกุจฺฉึ ปวิสิตฺวา ปจฺฉิมภาเคน ผาเลตฺวา นิกฺขนฺตสทิโส อุทกํ อาโลเฬนฺโต ปจฺฉิมภาเค ปติ ฯ เกวฏฺฏา มจฺฉา ชาลํ ผาเลตฺวา คตาติ มญฺญมานา ชาลโกฏิยํ คเหตฺวา อุกฺขิปึสุ ฯ เต เทฺวปิ มจฺฉา ชาลโต มุจฺจิตฺวา อุทเก ปตึสุ ฯ อิติ เตหิ มิตจินฺตึ นิสฺสาย ชีวิตํ ลทฺธํ ฯ

สตฺถา อิมํ อตีตํ อาหริตฺวา อภิสมฺพุทฺโธ หุตฺวา อิมํ คาถมาห

พหุจินฺตี อปฺปจินฺตี จ อุโภ ชาเล อพชฺฌเร

มิตจินฺตี อโมเจสิ อุโภ ตตฺถ สมาคตาติ ฯ

ตตฺถ พหุจินฺตีติ พหุจินฺตนาย วิตกฺกพหุลตาย เอวํลทฺธนาโม ฯ อิตเรสุปิ ทฺวีสุ อยเมว นโย ฯ อุโภ ตตฺถ สมาคตาติ มิตจินฺตึ นิสฺสาย ลทฺธชีวิตา ตตฺถ อุทเกสุ ปุน อุโภปิ ชนา มิตจินฺตินา สทฺธึ สมาคตาติ อตฺโถ ฯ

เอวํ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน มหลฺลกภิกฺขู โสตาปตฺติผเล ปติฏฺฐหึสุ ฯ ตทา พหุจินฺตี อปฺปจินฺตี จ อิเม เทฺว ภิกฺขู อเหสุํ มิตจินฺตี ปน อหเมวาติ ฯ

มิตจินฺติชาตกํ จตุตฺถํ ฯ

-------