๔. ฌานโสธนชาดก

๔. ฌานโสธนชาตกํ

เย สญฺญิโนติ อิทํ สตฺถา เชตวเน วิหรนฺโต สงฺกสฺสนครทฺวาเร อตฺตนา สงฺขิตฺเตน ปุจฺฉิตปญฺหสฺส ธมฺมเสนาปตินา วิตฺถารพฺยากรณํ อารพฺภ กเถสิ ฯ ตตฺริทํ อตีตวตฺถุํ ฯ

อตีเต กิร พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อรญฺญายตเน กาลํ กโรนฺโต อนฺเตวาสิเกหิ ปุจฺฉิโต เนวสญฺญีนาสญฺญีติ อาห ฯเปฯ ตาปสา เชฏฺฐนฺเตวาสิกสฺส กถํ น คณฺหึสุ ฯ โพธิสตฺโต อาภสฺสรโต อาคนฺตฺวา อากาเส ฐตฺวา อิมํ คาถมาห

เย สญฺญิโน เตปิ ทุคฺคตา

เยปิ อสญฺญิโน เตปิ ทุคฺคตา

เอตํ อุภยํ วิวชฺชย

ตํ สมาปตฺติสุขํ อนงฺคณนฺติ ฯ

ตตฺถ เย สญฺญิโนติ ฐเปตฺวา เนวสญฺญานาสญฺญายตนลาภิโน อวเสเส สจิตฺตกสตฺเต ทสฺเสติ ฯ เตปิ ทุคฺคตาติ ตสฺสา สมาปตฺติยา อลาภโต เตปิ ทุคฺคตา นาม ฯ เยปิ อสญฺญิโนติ อสญฺญิภเว นิพฺพตฺเต อจิตฺตกสตฺเต ทสฺเสติ ฯ เตปิ ทุคฺคตาติ เตปิ อิมิสฺสาเยว สมาปตฺติยา อลาภโต ทุคฺคตาเยว นาม ฯ เอตํ อุภยํ วิวชฺชยาติ เอตํ อุภยมฺปิ สญฺญิภาวญฺจ อสญฺญิภาวญฺจ วิวชฺชย ปชหาติ อนฺเตวาสิกํ โอวทติ ฯ ตํ สมาปตฺติสุขํ อนงฺคณนฺติ ตํ เนวสญฺญานาสญฺญายตนสมาปตฺติลาภิโน สนฺตสนฺเตน สุขนฺติ สงฺขํ คตํ ฌานสุขํ อนงฺคณํ นิทฺโทสํ พลวจิตฺเตกคฺคตาสภาเวนปิ ตํ อนงฺคณํ นาม ชาตํ ฯ

เอวํ โพธิสตฺโต ธมฺมํ เทเสตฺวา อนฺเตวาสิกสฺส คุณํ กเถตฺวา พฺรหฺมโลกเมว อคมาสิ ฯ ตทา เสสตาปสา เชฏฺฐนฺเตวาสิกสฺส สทฺทหึสุ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา เชฏฺฐนฺเตวาสิโก สารีปุตฺโต มหาพฺรหฺมา ปน อหเมวาติ ฯ

ฌานโสธนชาตกํ จตุตฺถํ ฯ

-------