๘. สีหโกตถุกชาดก

๘ สีหโกฏฺฐุกชาตกํ

สีหงฺคุลี สีหนโขติ อิทํ สตฺถา เชตวเน วิหรนฺโต โกกาลิกํ อารพฺภ กเถสิ ฯ

เอกทิวสํ กิร โกกาลิโก อญฺเญสุ พหุสฺสุเตสุ ธมฺมกถํ กเถนฺเตสุ สยมฺปิ กเถตุกาโม อโหสิ ฯ สพฺพํ เหฏฺฐาวุตฺตนเยเนว วิตฺถาเรตพฺพํ ฯ

ตํ ปน ปวตฺตึ สุตฺวา สตฺถา น ภิกฺขเว โกกาลิโก อิทาเนว อตฺตโน สทฺเทน ปากโฏ ชาโต, ปุพฺเพปิ ปากโฏ อโหสิ เยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต ตทา โพธิสตฺโต หิมวนฺตปฺปเทเส สีโห หุตฺวา เอกาย สิคาลิยา สทฺธึ สํวาสมนฺวาย ปุตฺตํ ปฏลภติ ฯ โส องฺคุลีหิ นเขหิ เกสเรน วณฺณสณฺฐาเนนาติ อิเมหิ อากาเรหิ ปิตุสทิโส อโหสิ, สทฺเทน มาตุสทิโส ฯ อเถกทิวสํ เทเว วสฺสิตฺวา วิคเต สีเหสุ นทิตฺวา สีหกีฬํ กีฬนฺเตสุ โสปิ เตสํ อนฺตเร นทิตุกาโม หุตฺวา สิคาลิกํ นาทํ นทิ ฯ อถสฺส สทฺทํ สุตฺวา สีหา ตุณฺหี อเหสุํ ฯ ตสฺส สทฺทํ สุตฺวา อปโร โพธิสตฺตสฺส สชาติปุตฺโต ตาต อยํ สีโห วณฺณาทีหิ อมฺเหหิ สมาโน, สทฺโท ปนสฺส อญฺญสทิโส, ๑- โก นาเมโสติ ปุจฺฉนฺโต ปฐมํ คาถมาห

สีหงฺคุลี สีหนโข สีหปาทปติฏฺฐิโต

โส สีโห สีหสงฺฆมฺหิ เอโก นทติ อญฺญถาติ ฯ

ตตฺถ สีหปาทปติฏฺฐิโตติ สีหปาเทเหว ปติฏฺฐิโต ฯ เอโก นทติ อญฺญถาติ เอโก ว อวเสสสีเหหิ อสทิเสน สิคาลสทฺเทน นทนฺโต อญฺญถา นทติ ฯ

ตํ สุตฺวา โพธิสตฺโต ตาต เอส ตว ภาตา สิคาลิยา ปุตฺโต รูเปน มยา สทิโส สทฺเทน มาตรา สทิโสติ วตฺวา สิคาลิปุตฺตํ อามนฺเตตฺวา ตาต ตฺวํ อิโต ปฏฺฐาย อิธ วสนฺโต อปฺปสทฺโท วส, สเจ ปุน นทิสฺสสิ, สิคาลภาวํ เต ชานิสฺสนฺตีติ โอวทนฺโต ทุติยํ คาถมาห

@เชิงอรรถ: ๑ อญฺญาทิโสติปิ ฯ

มา ตฺวํ นทิ ราชปุตฺต อปฺปสทฺโท วเน วสิ,

สเรน โข ตํ ชาเนยฺยุํ น หิ เต เปตฺติโก สโรติ ฯ

ตตฺถ ราชปุตฺตาติ สีหมิครญฺโญ ปุตฺโต ฯ

อิทญฺจ ปน โอวาทํ สุตฺวา ปุน โส นทิตุํ น อุสฺสหิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา สิคาโล โกกาลิโก อโหสิ, สชาติปุตฺโต ราหุโล, มิคราชา ปน อหเมวาติ ฯ

สีหโกฏฺฐุกชาตกํ อฏฺฐมํ ฯ