๙. สีหจัมมชาดก

๙ สีหจมฺมชาตกํ

เนตํ สีหสฺส นทิตนฺติ อิทํ สตฺถา เชตวเน วิหรนฺโต โกกาลิกญฺเญว อารพฺภ กเถสิ ฯ

โส อิมสฺมึ กาเล สรภญฺญํ ภณิตุกาโม อโหสิ ฯ สตฺถา ตํ ปวตฺตึ สุตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กสกกุเล นิพฺพตฺติตฺวา วยปฺปตฺโต กสิกมฺเมเนว ชีวิตํ กปฺเปสิ ฯ ตสฺมึ กาเล เอโก วาณิโช คทฺรภภารเกน โวหารํ กโรนฺโต วิจรติ ฯ โส คตคตฏฺฐาเน คทฺรภสฺส ปิฏฺฐิโต ภณฺฑิกํ โอตาเรตฺวา คทฺรภํ สีหจมฺเมน ปารุเปตฺวา สาลิยวเขตฺเตสุ วิสฺสชฺเชติ ฯ เขตฺตรกฺขิกา ตํ ทิสฺวา สีโหติ สญฺญาย อุปสงฺกมิตุํ น สกฺโกนฺติ ฯ อเถกทิวสํ โส วาณิโช เอกสฺมึ คามทฺวาเร นิวาสํ คเหตฺวา ปาตราสํ ปจาเปนฺโต ตโต คทฺรภํ สีหจมฺเมน ปารุเปตฺวา ยวเขตฺเต วิสฺสชฺเชสิ ฯ เขตฺตรกฺขิกา ตํ ทิสฺวา สีโหติ สญฺญาย ตํ อุปสงฺกมิตุํ อสกฺโกนฺโต เคหํ คนฺตฺวา อาโรเจสุํ ฯ สกลคามวาสิโน อาวุธานิ คเหตฺวา สงฺเข ธเมนฺตา เภริโย วาเทนฺตา เขตฺตสมีปํ คนฺตฺวา อุนฺนทึสุ ฯ คทฺรโภ มรณภยภีโต คทฺรภรวํ รวิ ฯ อถสฺส คทฺรภภาวํ ญตฺวา โพธิสตฺโต ปฐมํ คาถมาห

เนตํ สีหสฺส นทิตํ น พฺยคฺฆสฺส น ทีปิโน,

ปารุโต สีหจมฺเมน ชมฺโม นทติ คทฺรโภติ ฯ

ตตฺถ ชมฺโมติ ลามโก ฯ

คามวาสิโนปิ ตสฺส คทฺรภภาวํ ญตฺวา อฏฺฐีนิ ภญฺชนฺตา โปเถตฺวา ปาเตตฺวา สีหจมฺมํ อาทาย อคมํสุ ฯ อถ โส วาณิโช อาคนฺตฺวา ตํ พฺยสนปฺปตฺตํ คทฺรภํ ทิสฺวา ทุติยํ คาถมาห

จิรมฺปิ โข ตํ ขาเทยฺย คทฺรโภ หริตํ ยวํ

ปารุโต สีหจมฺเมน รวมาโนว ทูสยีติ ฯ

ตตฺถ ตนฺติ นิปาตมตฺตํ ฯ อยํ คทฺรโภ อตฺตโน คทฺรภภาวํ อชานาเปตฺวา สีหจมฺเมน ปารุโต จิรมฺปิ กาลํ หริตํ ยวํ ขาเทยฺยาติ อตฺโถ ฯ รวมาโนว ทูสยีติ อตฺตโน ปน คทฺรภรวํ รวมาโน เจส อตฺตานํ ทูสยิ, นตฺเถตฺถ สีหจมฺมสฺส โทโสติ ฯ

ตสฺมึ เอวํ วทนฺเต เยว คทฺรโภ ตตฺเถว นิปนฺโน มริ ฯ วาณิโชปิ ตํ ปหาย ปกฺกามิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา คทฺรโภ โกกาลิโก อโหสิ, ปณฺฑิตกสโก ปน อหเมวาติ ฯ

สีหจมฺมชาตกํ นวมํ ฯ