๗. มาลุตชาดก

7 Mālutajātakaṃ

kāḷe vā yadi vā juṇheti idaṃ satthā jetavane viharanto dve vuḍḍhapabbajite ārabbha kathesi.

Te kira kosalajanapade ekasmiṃ araññavāse vasanti eko kāḷatthero nāma eko juṇhatthero nāma. Athekadivasaṃ juṇho kāḷaṃ pucchi bhante kāḷa sītannāma kismiṃ kāle hotīti. So kāḷe sītaṃ hotīti āha. Athekadivasaṃ kāḷo juṇhaṃ pucchi bhante juṇha sītaṃ nāma kismiṃ kāle hotīti. So juṇhe hotīti āha. Te ubhopi attano kaṅkhaṃ chindituṃ asakkontā satthu santikaṃ gantvā satthāraṃ vanditvā bhante sītaṃ nāma kismiṃ kāle hotīti pucchiṃsu. Satthā tesaṃ kathaṃ sutvā pubbepāhaṃ Bhikkhave tumhākaṃ idaṃ pañhaṃ kathesiṃ bhavasaṅkhepagatattā pana na sallakkhayitthāti vatvā atītaṃ āhari.

Atīte ekasmiṃ pabbatapāde sīho ca byaggho ca dve sahāyakā ekissāyeva guhāya vasanti. Tadā bodhisattopi isipabbajjaṃ pabbajitvā tasmiṃyeva pabbatapāde vasati. Athekadivasaṃ tesaṃ sahāyānaṃ sītaṃ nissāya vivādo udapādi. Byaggho kāḷeyeva sītaṃ hotīti āha. Sīho juṇheyevāti. Te ubhopi attano kaṅkhaṃ chindituṃ asakkontā bodhisattaṃ pucchiṃsu. Bodhisatto idaṃ gāthamāha

kāḷe vā yadi vā juṇhe yadā vāyati māluto

vātajāni hi sītāni ubhotthamaparājitāti.

Tattha kāḷe vā yadi vā juṇheti kāḷapakkhe vā juṇhapakkhe vā. Yadā vāyati mālutoti yasmiṃ samaye puratthimādibhedo vāto vāyati tasmiṃ samaye sītaṃ hoti. Kiṃkāraṇā. Vātajāni hi sītāni yasmā vāte vijjanteyeva sītāni honti kāḷapakkho vā juṇhapakkho vā ettha appamāṇanti vuttaṃ hoti. Ubhotthamaparājitāti ubhopi tumhe imasmiṃ pañhe aparājitāti.

Evaṃ bodhisatto te sahāyake saññāpesi. Satthāpi bhikkhave pubbepi mayā tumhākaṃ ayaṃ pañho kathitoti idaṃ dhammadesanaṃ āharitvā saccāni pakāsesi. Saccapariyosāne dvepi te therā sotāpattiphale patiṭṭhahiṃsu. Satthāpi anusandhiṃ ghaṭetvā jātakaṃ Samodhānesi tadā byaggho kāḷo ahosi sīho juṇho ahosi pañhaṃ vissajjanakatāpaso pana ahameva ahosīti.

Mālutajātakaṃ sattamaṃ.