๗. มาลุตชาดก

๗ มาลุตชาตกํ

กาเฬ วา ยทิ วา ชุณฺเหติ อิทํ สตฺถา เชตวเน วิหรนฺโต เทฺว วุฑฺฒปพฺพชิเต อารพฺภ กเถสิ ฯ

เต กิร โกสลชนปเท เอกสฺมึ อรญฺญวาเส วสนฺติ เอโก กาฬตฺเถโร นาม เอโก ชุณฺหตฺเถโร นาม ฯ อเถกทิวสํ ชุณฺโห กาฬํ ปุจฺฉิ ภนฺเต กาฬ สีตนฺนาม กิสฺมึ กาเล โหตีติ ฯ โส กาเฬ สีตํ โหตีติ อาห ฯ อเถกทิวสํ กาโฬ ชุณฺหํ ปุจฺฉิ ภนฺเต ชุณฺห สีตํ นาม กิสฺมึ กาเล โหตีติ ฯ โส ชุณฺเห โหตีติ อาห ฯ เต อุโภปิ อตฺตโน กงฺขํ ฉินฺทิตุํ อสกฺโกนฺตา สตฺถุ สนฺติกํ คนฺตฺวา สตฺถารํ วนฺทิตฺวา ภนฺเต สีตํ นาม กิสฺมึ กาเล โหตีติ ปุจฺฉึสุ ฯ สตฺถา เตสํ กถํ สุตฺวา ปุพฺเพปาหํ ภิกฺขเว ตุมฺหากํ อิทํ ปญฺหํ กเถสึ ภวสงฺเขปคตตฺตา ปน น สลฺลกฺขยิตฺถาติ วตฺวา อตีตํ อาหริ ฯ

อตีเต เอกสฺมึ ปพฺพตปาเท สีโห จ พฺยคฺโฆ จ เทฺว สหายกา เอกิสฺสาเยว คุหาย วสนฺติ ฯ ตทา โพธิสตฺโตปิ อิสิปพฺพชฺชํ ปพฺพชิตฺวา ตสฺมึเยว ปพฺพตปาเท วสติ ฯ อเถกทิวสํ เตสํ สหายานํ สีตํ นิสฺสาย วิวาโท อุทปาทิ ฯ พฺยคฺโฆ กาเฬเยว สีตํ โหตีติ อาห ฯ สีโห ชุณฺเหเยวาติ ฯ เต อุโภปิ อตฺตโน กงฺขํ ฉินฺทิตุํ อสกฺโกนฺตา โพธิสตฺตํ ปุจฺฉึสุ ฯ โพธิสตฺโต อิทํ คาถมาห

กาเฬ วา ยทิ วา ชุณฺเห ยทา วายติ มาลุโต

วาตชานิ หิ สีตานิ อุโภตฺถมปราชิตาติ ฯ

ตตฺถ กาเฬ วา ยทิ วา ชุณฺเหติ กาฬปกฺเข วา ชุณฺหปกฺเข วา ฯ ยทา วายติ มาลุโตติ ยสฺมึ สมเย ปุรตฺถิมาทิเภโท วาโต วายติ ตสฺมึ สมเย สีตํ โหติ ฯ กึการณา ฯ วาตชานิ หิ สีตานิ ยสฺมา วาเต วิชฺชนฺเตเยว สีตานิ โหนฺติ กาฬปกฺโข วา ชุณฺหปกฺโข วา เอตฺถ อปฺปมาณนฺติ วุตฺตํ โหติ ฯ อุโภตฺถมปราชิตาติ อุโภปิ ตุมฺเห อิมสฺมึ ปญฺเห อปราชิตาติ ฯ

เอวํ โพธิสตฺโต เต สหายเก สญฺญาเปสิ ฯ สตฺถาปิ ภิกฺขเว ปุพฺเพปิ มยา ตุมฺหากํ อยํ ปญฺโห กถิโตติ อิทํ ธมฺมเทสนํ อาหริตฺวา สจฺจานิ ปกาเสสิ ฯ สจฺจปริโยสาเน เทฺวปิ เต เถรา โสตาปตฺติผเล ปติฏฺฐหึสุ ฯ สตฺถาปิ อนุสนฺธึ ฆเฏตฺวา ชาตกํ สโมธาเนสิ ตทา พฺยคฺโฆ กาโฬ อโหสิ สีโห ชุณฺโห อโหสิ ปญฺหํ วิสฺสชฺชนกตาปโส ปน อหเมว อโหสีติ ฯ

มาลุตชาตกํ สตฺตมํ ฯ