๕. อันตชาดก

อนฺตชาตกํ

อุสภสฺเสว เต ขนฺโธติ อิทํ สตฺถา เชตวเน วิหรนฺโต เตเยว เทฺว ชเน อารพฺภ กเถสิ ฯ ปจฺจุปฺปนฺนวตฺถุ ปุริมสทิสเมว ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เอกสฺมึ คามุปจาเร เอรณฺฑรุกฺขเทวตา หุตฺวา นิพฺพตฺติ ฯ ตทา ตสฺมึ คาเม มตํ ชรควํ นิกฺกฑฺฒิตฺวา คามทฺวาเร เอรณฺฑวเน ฉฑฺเฑสุํ ฯ เอโก สิคาโล อาคนฺตฺวา ตสฺส มํสํ ขาทิ ฯ เอโก กาโก อาคนฺตฺวา เอรณฺเฑ นิสินฺโน ๑- ตํ ทิสฺวา ยนฺนูนาหํ เอตสฺส

@เชิงอรรถ: ๑ นิลีโน ฯ อภูตคุณกถํ กเถตฺวา มํสํ ขาเทยฺยนฺติ จินฺเตตฺวา ปฐมํ คาถมาห

อุสภสฺเสว เต ขนฺโธ สีหสฺเสว วิชมฺภิตํ

มิคราช นโม ตฺยตฺถุ อปิ กิญฺจิ ลภามเสติ ฯ

ตตฺถ นโม ตฺยตฺถูติ นโม เต อตฺถุ ฯ

ตํ สุตฺวา สิคาโล ทุติยํ คาถมาห

กุลปุตฺโต ปชานาติ กุลปุตฺตํ ปสํสิตุํ

มยูรคีวสงฺกาส อิโต ปริยาท ๑- วายสาติ ฯ

ตตฺถ อิโต ปริยาทาติ เอรณฺฑโต โอตริตฺวา อิโต เยนาหํ เตนาคนฺตฺวา มํสํ ขาทาติ วทติ ฯ

ตนฺเตสํ กิริยํ ทิสฺวา รุกฺขเทวตา ตติยํ คาถมาห

มิคานํ โกฏฺฐโก ๒- อนฺโต ปกฺขีนํ ปน วายโส

เอรณฺโฑ สพฺพรุกฺขานํ ตโย อนฺตา สมาคตาติ ฯ

ตตฺถ อนฺโตติ หีโน ลามโก ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา สิคาโล เทวทตฺโต อโหสิ กาโก โกกาลิโก รุกฺขเทวตา ปน อหเมวาติ ฯ

อนฺตชาตกํ ปญฺจมํ