๑๐. กุกกุฏชาดก

[๑๔๒๒] นาสฺมเส กตปาปมฺหิ นาสฺมเส อลิกวาทิเน นาสฺมเส อตฺตตฺถปญฺญมฺหิ อติสนฺเตปิ นาสฺมเส ฯ

[๑๔๒๓] ภวนฺติ เหเก ปุริสา โคปิปาสิกชาติกา ๑ ฆสนฺติ มญฺเญ มิตฺตานิ วาจาย น จ กมฺมุนา ฯ

[๑๔๒๔] สุกฺขญฺชลิปคฺคหิตา วาจาย ปลิคุณฺฐิตา มนุสฺสเผคฺคู นาสิเท ยสฺมึ นตฺถิ กตญฺญุตา ฯ

[๑๔๒๕] น หิ อญฺโญญฺญจิตฺตานํ ๒ อิตฺถีนํ ปุริสาน วา นานาวิกตฺวา สํสคฺคํ ตาทิสมฺปิ น วิสฺสเส ๓ ฯ #๑ สี. ยุ. โคปิปาสกชาติกา ฯ ๒ ม. อญฺญญฺญจิตฺตานํ ฯ ๓ ม. จ นาสฺมเส ฯ

[๑๔๒๖] อนริยกมฺมอุกฺกนฺตํ ๑ อตฺเถตํ ๒ สพฺพฆาตินํ นิสิตํว ปฏิจฺฉนฺนํ ตาทิสมฺปิ น วิสฺสเส ๓ ฯ

[๑๔๒๗] มิตฺตวเสนิเธกจฺเจ ๔ สาขลฺเยน อเจตสา วิวิเธหิ อุปายนฺติ ตาทิสมฺปิ น วิสฺสเส ฯ

[๑๔๒๘] อามิสํ วา ธนํ วาปิ ยตฺถ ปสฺสติ ตาทิโส ทุพฺภึ กโรติ ทุมฺเมโธ ตญฺจ หนฺตฺวาน คจฺฉติ ฯ

[๑๔๒๙] มิตฺตรูเปน พหโว ฉนฺนา เสวนฺติ สตฺตโว ชเห กาปุริเส เหเต กุกฺกุโฏ วิย เสนกํ ฯ

[๑๔๓๐] โย จ อุปฺปติตํ อตฺถํ ขิปฺปเมว น พุชฺฌติ อมิตฺตวสมเนฺวติ ปจฺฉาว อนุตปฺปติ ฯ

[๑๔๓๑] โย จ อุปฺปติตํ อตฺถํ ขิปฺปเมว นิโพธติ มุจฺจเต สตฺตุสมฺพาธา กุกฺกุโฏ วิย เสนกา ฯ

[๑๔๓๒] ตํ ตาทิสํ กูฏมิโวฑฺฑิตํ วเน อธมฺมิกํ นิจฺจวิธํสการินํ อารา วิวชฺเชยฺย นโร วิจกฺขโณ เสนํ ยถา กุกฺกุโฏ วํสกานเนติ ฯ กุกฺกุฏชาตกํ ทสมํ ฯ ___________ #๑ ม. กมฺมโมกฺกนฺตํ ฯ ๒ ม. อเถตํ ฯ ๓ ม. จ นาสฺมเส ฯ เอวมุปริปิ ฯ #๔ มิตฺตรูเป อิเธกจฺเจติปิ ปาโฐ ฯ สี. ม. มิตฺตรูเปนิเธกจฺเจ ฯ ๑๑ มฏฺฐกุณฺฑลิชาตกํ