๙. เภริวาทชาดก

9. Bherivādajātakaṃ

dhame dhameti idaṃ satthā jetavane viharanto aññataraṃ dubbacaṃ ārabbha kathesi.

Tañhi bhikkhuṃ satthā saccaṃ kira tvaṃ dubbacosīti pucchitvā saccaṃ bhagavāti vutte na tvaṃ bhikkhu idāneva dubbaco pubbepi dubbacoyevāti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto bherivādakakule nibbattitvā gāmake vasati. So bārāṇasiyaṃ nakkhattaṃ saṅghuṭṭhanti sutvā samajjamaṇḍale bheriṃ vādetvā dhanaṃ āharissāmīti puttaṃ ādāya tattha gantvā bheriṃ vādetvā bahuṃ dhanaṃ labhi taṃ ādāya attano gāmaṃ gacchanto coraaṭaviṃ patvā puttaṃ nirantaraṃ bheriṃ vādentaṃ vāresi tāta nirantaraṃ bheriṃ avādetvā maggapaṭipannaissarabheriṃ viya antarantarā vādehīti. So pitarā vāriyamānopi bherisaddeneva core palāpessāmīti vatvā nirantarameva vādeti. Corā paṭhamaññeva bherisaddaṃ sutvā issarabheri viya bhavissatīti palāyitvā ativiya ekābaddhaṃ saddaṃ sutvā nāyaṃ issarabheri bhavissatīti āgantvā upadhārentā dveyeva jane disvā pothetvā vilumpiṃsu. Bodhisatto kicchena vata no laddhadhanaṃ ekābaddhaṃ katvā vādento nāsesīti vatvā imaṃ gāthamāha

dhame dhame nātidhame atidhantaṃ hi pāpakaṃ

dhamantena sataṃ laddhaṃ atidhantena nāsitanti.

Tattha dhame dhameti dhameyya no na dhameyya bheriṃ vādeyya no na vādeyyāti attho. Nātidhameti atikkamitvā pana nirantarameva katvā na vādeyya. Kiṃkāraṇā. Atidhantaṃ hi pāpakanti nirantaraṃ bherivādanaṃ idāni amhākaṃ pāpakaṃ lāmakaṃ jātaṃ. Dhamantena sataṃ laddhanti nagare bherivādanena kahāpaṇasataṃ laddhaṃ. Atidhantena nāsitanti Idāni pana me puttena vacanaṃ akatvā yaṃ idaṃ aṭaviyaṃ atidhantaṃ tena atidhantena sabbaṃ nāsitanti.

Satthā imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā putto dubbacabhikkhu ahosi pitā pana ahamevāti.

Bherivādajātakaṃ navamaṃ.