๑๐. สังขธมนชาดก

๑๐. สงฺขธมนชาตกํ

ธเม ธเมติ อิทํ สตฺถา เชตวเน วิหรนฺโต ทุพฺพจเมว อารพฺภ กเถสิ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สงฺขธมกุเล นิพฺพตฺติตฺวา พาราณสิยํ นกฺขตฺเต สงฺฆุฏฺเฐ ปิตรํ อาทาย สงฺขธมนกมฺเมน ธนํ ลภิตฺวา อาคมนกาเล โจรอฏวิยํ ปิตรํ นิรนฺตรํ สงฺขธมนฺตํ วาเรสิ ฯ โส สงฺขสทฺเทน โจเร ปลาเปสฺสามีติ นิรนฺตรเมว ธมิ ฯ โจรา ปุริมนเยเนว อาคนฺตฺวา วิลุมฺปึสุ ฯ โพธิสตฺโต ปุริมนเยเนว คาถมาห

ธเม ธเม นาติธเม อติธนฺตํ หิ ปาปกํ

ธนฺเตนาธิคตา โภคา เต ตาโต วิธมี ธมนฺติ ฯ

ตตฺถ เต ตาโต วิธมี ธมนฺติ เต สงฺขํ ธมิตฺวา ลทฺธโภเค มม ปิตา ปุนปฺปุนํ ธมนฺโต วิธมิ วิทฺธํเสสิ วินาเสสีติ ฯ

สตฺถา อิมํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ ตทา ปิตา ทุพฺพจภิกฺขุ อโหสิ ปุตฺโต ปน อหเมวาติ ฯ

สงฺขธมนชาตกํ ทสมํ ฯ

อาสึสวคฺโค ฉฏฺโฐ ฯ