๑๐. สังขธมนชาดก

10. Saṅkhadhamanajātakaṃ

dhame dhameti idaṃ satthā jetavane viharanto dubbacameva ārabbha kathesi.

Atīte bārāṇasiyaṃ brahmadatte rajjaṃ kārente bodhisatto saṅkhadhamakule nibbattitvā bārāṇasiyaṃ nakkhatte saṅghuṭṭhe pitaraṃ ādāya saṅkhadhamanakammena dhanaṃ labhitvā āgamanakāle coraaṭaviyaṃ pitaraṃ nirantaraṃ saṅkhadhamantaṃ vāresi. So saṅkhasaddena core palāpessāmīti nirantarameva dhami. Corā purimanayeneva āgantvā vilumpiṃsu. Bodhisatto purimanayeneva gāthamāha

dhame dhame nātidhame atidhantaṃ hi pāpakaṃ

dhantenādhigatā bhogā te tāto vidhamī dhamanti.

Tattha te tāto vidhamī dhamanti te saṅkhaṃ dhamitvā laddhabhoge Mama pitā punappunaṃ dhamanto vidhami viddhaṃsesi vināsesīti.

Satthā imaṃ dhammadesanaṃ āharitvā anusandhiṃ ghaṭetvā jātakaṃ samodhānesi tadā pitā dubbacabhikkhu ahosi putto pana ahamevāti.

Saṅkhadhamanajātakaṃ dasamaṃ.

Āsiṃsavaggo chaṭṭho.