๕. กิมปักกชาดก

๕. กิมฺปกฺกชาตกํ

อายตึ โทสํ นาญฺญายาติ อิทํ สตฺถา เชตวเน วิหรนฺโต เอกํ อุกฺกณฺฐิตภิกฺขุํ อารพฺภ กเถสิ ฯ

อญฺญตโร กิร กุลปุตฺโต พุทฺธสาสเน อุรํ ทตฺวา ปพฺพชิโต เอกทิวสํ สาวตฺถิยํ ปิณฺฑาย จรนฺโต เอกํ อลงฺกตํ อิตฺถึ ทิสฺวา อุกฺกณฺฐิ ฯ อถ นํ อาจริยุปชฺฌายา สตฺถุ สนฺติกํ อานยึสุ ฯ สตฺถา สจฺจํ กิร ตฺวํ ภิกฺขุ อุกฺกณฺฐิโตสีติ ปุจฺฉิตฺวา สจฺจนฺติ วุตฺเต ภิกฺขุ ปญฺจ กามคุณา นาเมเต ปริโภคกาเล รมฺมณียา โส ปน เนสํ ปริโภโค นิรยาทีสุ ปฏิสนฺธิทายกตฺตา กิมฺปกฺกผลปริโภคสทิโส โหติ กิมฺปกฺกผลํ นาม วณฺณคนฺธรสสมฺปนฺนํ ขาทิตํ ปน อนฺตานิ ขณฺเฑตฺวา ชีวิตกฺขยํ ปาเปติ ปุพฺเพ พหู ชนา ตสฺส โทสํ อทิสฺวา วณฺณคนฺธรเสสุ พชฺฌิตฺวา ตํ ผลํ ปริภุญฺชิตฺวา ชีวิตกฺขยํ ปาปุณึสูติ วตฺวา เตหิ ภิกฺขูหิ ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สตฺถวาโห หุตฺวา ปญฺจหิ สกฏสเตหิ ปุพฺพนฺตาปรนฺตํ คจฺฉนฺโต อฏวีมุขํ ปตฺวา มนุสฺเส สนฺนิปาเตตฺวา อิมิสฺสา อฏวิยา วิสรุกฺขา นาม อตฺถิ มา โข มํ อนาปุจฺฉา ปุพฺเพ อขาทิตปุพฺพานิ ผลาผลานิ ขาทิตฺถาติ โอวทิ ฯ มนุสฺสา อฏวึ อติกฺกมิตฺวา อฏวีมุเข เอกํ กิมฺปกฺกรุกฺขํ ผลภารโอนมิตสาขํ อทฺทสํสุ ฯ ตสฺส ขนฺธสาขาปตฺตผลานิ สณฺฐานวณฺณคนฺธรเสหิ อมฺพสทิสาเนว ฯ เตสุ เอกจฺเจ วณฺณคนฺธรเสสุ พชฺฌิตฺวา อมฺพผลสญฺญาย ผลานิ ขาทึสุ เอกจฺเจ สตฺถวาหํ ปุจฺฉิตฺวา ขาทิสฺสามาติ คเหตฺวา อฏฺฐํสุ ฯ โพธิสตฺโต ตํ ฐานํ ปตฺวา เต คเหตฺวา ฐิเต ผลานิ ฉฑฺฑาเปตฺวา เย ขาทิตฺวา อฏฺฐํสุ เต วมนํ กาเรตฺวา เตสํ เภสชฺชํ อทาสิ ฯ เตสุ เอกจฺเจ อโรคา ชาตา ปฐมเมว ขาทิตฺวา ฐิตา ปน ชีวิตกฺขยํ ปตฺตา ฯ โพธิสตฺโตปิ อิจฺฉิตฏฺฐานํ โสตฺถินา คนฺตฺวา ลาภํ ลภิตฺวา ปุน สกฏฺฐานเมว อาคนฺตฺวา ทานาทีนิ ปุญฺญานิ กตฺวา ยถากมฺมํ คโต ฯ

สตฺถา ตํ วตฺถุํ กเถตฺวา อภิสมฺพุทฺโธ หุตฺวา อิมํ คาถมาห

อายตึ โทสํ นาญฺญาย โย กาเม ปฏิวิเสวติ

วิปากนฺเต หนนฺตี นํ กิมฺปกฺกมิว ภกฺขิตนฺติ ฯ

ตตฺถ อายตึ โทสํ นาญฺญายาติ อนาคเต โทสํ น อญฺญาย อชานิตฺวาติ อตฺโถ ฯ โย กาเม ปฏิเสวตีติ โย วตฺถุกาเม จ กิเลสกาเม จ ปฏิเสวติ ฯ วิปากนฺเต หนนฺตี นนฺติ เต กามา นํ ปุริสํ อตฺตโน วิปากสงฺขาเต อนฺเต นิรยาทีสุ อุปฺปนฺนํ นานปฺปกาเรน ทุกฺเขน สํโยชิยมานา หนนฺติ ฯ กถํ ฯ กิมฺปกฺกมิว ภกฺขิตนฺติ ยถา ปริโภคกาเล วณฺณคนฺธรสสมฺปตฺติยา มนาปํ กิมฺปกฺกผลํ อนาคตโทสํ อทิสฺวา ภกฺขิตํ ชีวิตกฺขยํ ปาเปติ เอวํ ปริโภคกาเล มนาปาปิ กามา วิปากกาเล หนนฺตีติ ฯ

สตฺถา เทสนํ ยถานุสนฺธึ ปาเปตฺวา สจฺจานิ ปกาเสสิ ฯ อุกฺกณฺฐิตภิกฺขุ โสตาปตฺติผลํ ปาปุณิ ฯ เสสปริสา เกจิ โสตาปนฺนา เกจิ สกทาคามิโน เกจิ อนาคามิโน เกจิ อรหนฺโต อเหสุํ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ปริสา พุทฺธปริสา อเหสุํ สตฺถวาโห ปน อหเมวาติ ฯ

กิมฺปกฺกชาตกํ ปญฺจมํ ฯ