๘. สรัมภชาดก

๘. สารมฺภชาตกํ

กลฺยาณเมว มุญฺเจยฺยาติ อิทํ สตฺถา สาวตฺถึ อุปนิสฺสาย เชตวเน วิหรนฺโต โอมสวาทสิกฺขาปทํ อารพฺภ กเถสิ ฯ เทฺวปิ วตฺถูนิ เหฏฺฐา นนฺทิวิสาลชาตเก วุตฺตสทิสาเนว ฯ อิมสฺมึ ปน ชาตเก โพธิสตฺโต คนฺธารรฏฺเฐ ตกฺกสิลายํ อญฺญตรสฺส พฺราหฺมณสฺส สารมฺโภ นาม พลิพทฺโท อโหสิ ฯ สตฺถา อิทํ อตีตวตฺถุํ กเถตฺวา อภิสมฺพุทฺโธ หุตฺวา อิมํ คาถมาห

กลฺยาณเมว มุญฺเจยฺย น หิ มุญฺเจยฺย ปาปิกํ

โมกฺโข กลฺยาณิยา สาธุ มุตฺวา ตปติ ปาปิกนฺติ ฯ

ตตฺถ กลฺยาณเมว มุญฺเจยฺยาติ จตุทฺโทสวินิมุตฺตํ กลฺยาณํ สุนฺทรํ อนวชฺชเมว มุญฺเจยฺย วิสฺสชฺเชยฺย กเถยฺย ฯ น หิ มุญฺเจยฺย ปาปิกนฺติ ปาปิกํ ลามกํ ปเรสํ อปฺปิยํ อมนาปํ น มุญฺเจยฺย ฯ โมกฺโข กลฺยาณิยา สาธูติ กลฺยาณวาจาย วิสฺสชฺชนเมว อิมสฺมึ โลเก สาธุ สุนฺทรํ ภทฺทกํ ฯ มุตฺวา ตปติ ปาปิกนฺติ ปาปิกํ ผรุสวาจํ มุญฺจิตฺวา วิสฺสชฺเชตฺวา กเถตฺวา โส ปุคฺคโล ตปติ โสจติ กิลมตีติ ฯ

เอวํ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา พฺราหฺมโณ อานนฺโท อโหสิ พฺราหฺมณี อุปฺปลวณฺณา สารมฺโภ ปน อหเมวาติ ฯ

สารมฺภชาตกํ อฏฺฐมํ ฯ