๑๐ กนฺทคลกชาตกํ

อมฺโภ โก นามยํ รุกฺโขติ อิทํ สตฺถา เวฬุวเน วิหรนฺโต สุคตาลยํ อารพฺภ กเถสิ ฯ

ตทา หิ สตฺถา เทวทตฺโต สุคตาลยํ อกาสีติ สุตฺวา น ภิกฺขเว อิทาเนว เทวทตฺโต มยฺหํ อนุกโรนฺโต วินาสํ ปตฺโต ปุพฺเพปิ ปาปุณิ เยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส รุกฺขโกฏฺฏกสกุณโยนิยํ นิพฺพตฺติ ฯ ขทิรวเน โคจรํ คณฺหิ ฯ ขทิรวนิโยติสฺส นามํ อโหสิ ฯ ตสฺเสโก กนฺทคลโก นาม สหาโย อโหสิ ฯ โส ปาตลิภทฺทกวเน โคจรํ คณฺหติ ฯ โส เอกทิวสํ ขทิรวนิยสฺส สนฺติกํ อคมาสิ ฯ ขทิรวนิโย สหาโย เม อาคโตติ กนฺทคลกํ คเหตฺวา ขทิรวนํ ปวิสิตฺวา ขทิรขนฺธํ ตุณฺเฑน ปหริตฺวา รุกฺขโต ปาณเก นีหริตฺวา อทาสิ ฯ กนฺทคลโก ทินฺนทินฺเน มธุรปูเว วิย ฉินฺทิตฺวา ขาทิ ฯ ตสฺส ขาทนฺตสฺเสว มาโน อุปฺปชฺชิ อยมฺปิ รุกฺขโกฏฺฏกโยนิยํ นิพฺพตฺโต อหมฺปิ, กึ เม เอเตน ทินฺนโคจเรน, สยเมว ขทิรวเน โคจรํ คณฺหิสฺสามีติ ฯ โส ขทิรวนิยํ อาห สมฺม มา ตฺวํ ทุกฺขํ อนุภวิ, อหเมว ขทิรวเน โคจรํ คณฺหิสฺสามีติ ฯ อถ นํ โส อาห ตฺวํ สมฺม สิมฺพลิปาตลิ- ภทฺทกาทิวเน นิสฺสาเร โคจรคหเณน สํวฑฺฒิโต, ขทิรา นาม ชาตสารา ถทฺธา, มา เต เอตํ รุจฺจตีติ ฯ กนฺทคลโก กินฺทานาหํ น รุกฺขโกฏฺฏกโยนิยํ นิพฺพตฺโตติ ตสฺเสว วจนํ อนาทยิตฺวา เวเคน คนฺตฺวา ขทิรรุกฺขํ ตุณฺเฑน ปหริ ฯ ตาวเทวสฺส ตุณฺฑํ ภิชฺชิ, อกฺขีนิ นิกฺขมนาการปฺปตฺตานิ ชาตานิ, สีสํ ผลิตํ ฯ โส รุกฺขคฺเค ปติฏฺฐาตุํ อสกฺโกนฺโต ภูมิยํ ปติตฺวา ปฐมํ คาถมาห