๒ จุลฺลนนฺทิยชาตกํ

อิทํ ตทาจริยวโจติ อิทํ สตฺถา เวฬุวเน วิหรนฺโต เทวทตฺตํ อารพฺภ กเถสิ ฯ

เอกทิวสํ หิ ภิกฺขู ธมฺมสภายํ กถํ สมุฏฺฐาเปสุํ อาวุโส เทวทตฺโต นาม กกฺขโฬ ผรุโส สาหสิโก สมฺมาสมฺพุทฺเธ อภิมาเร ปโยเชสิ, สิลํ ปวิชฺฌิ, นาฬาคิรึ ปโยเชสิ, ขนฺติเมตฺตานุทฺทย- มตฺตมฺปิสฺส ตถาคเต นตฺถีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ เทวทตฺโต กกฺขโฬ ผรุโส นิกฺการุณิโก เยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส นนฺทิโย นาม วานโร อโหสิ ฯ กนิฏฺฐภาติโก ปนสฺส จุลฺลนนฺทิโย นาม ฯ เต อุโภปิ อสีติสหสฺสวานรปริวารา หิมวนฺตปฺปเทเส อนฺธํ มาตรํ ปฏิชคฺคนฺตา วาสํ กปฺเปสุํ ฯ เต มาตรํ สยนคุมฺเพ ฐเปตฺวา อรญฺญํ ปวิสิตฺวา มธุรานิ ผลานิ ลภิตฺวา มาตุยา เปเสนฺติ ฯ อาหรณกา ตสฺสา น เทนฺติ ฯ สา ขุทาย ปีฬิตา อฏฺฐิจมฺมาวเสสา กีสา อโหสิ ฯ อถ นํ โพธิสตฺโต อาห มยํ อมฺม ตุมฺหากํ มธุรผลานิ เปเสม, ตุมฺเห กสฺมา มิลายถาติ ฯ ตาต นาหํ ลภามีติ ฯ โพธิสตฺโต จินฺเตสิ มยิ ยูถํ ปริหรนฺเต มาตา เม นสฺสิสฺสติ, ยูถํ ปหาย มาตรํ เยว ปฏิชคฺคิสฺสามีติ ฯ โส จุลฺลนนฺทิยํ ปกฺโกสิตฺวา ตาต ตฺวํ ยูถํ ปริหร, อหํ มาตรํ ปฏิชคฺคิสฺสามีติ อาห ฯ โส ปน ภาติก มยฺหํ ยูถปริหรเณน กมฺมํ นตฺถิ, อหมฺปิ มาตรเมว ปฏิชคฺคิสฺสามีติ อาห ฯ อิติ เต อุโภปิ เอกฉนฺทา หุตฺวา ยูถํ ปหาย มาตรํ คเหตฺวา หิมวนฺตา โอรุยฺห ปจฺจนฺเต นิโคฺรธรุกฺเข วาสํ กปฺเปตฺวา มาตรํ ปฏิชคฺคึสุ ฯ อเถโก พาราณสิวาสี พฺราหฺมณมาณโว ตกฺกสิลายํ ทิสาปาโมกฺขสฺส อาจริยสฺส สนฺติเก สพฺพสิปฺปานิ อุคฺคณฺหิตฺวา คมิสฺสามีติ อาจริยํ อาปุจฺฉิ ฯ อาจริโยปิ องฺควิชฺชานุภาเวน ตสฺส กกฺขฬผรุสสาหสิกภาวํ ญตฺวา ตาต ตฺวํ กกฺขโฬ ผรุโส สาหสิโก, เอวรูปานํ ปน น สพฺพกาลํ เอกสทิสเมว อิชฺฌติ, มหาวินาสํ มหาทุกฺขํ ปสฺสิสฺสสิ, ๑- ตฺวํ มา กกฺขโฬ โหสิ, ปจฺฉานุตาปกรํ กมฺมํ มา กรีติ โอวทิตฺวา อุยฺโยเชสิ ฯ โส อาจริยํ วนฺทิตฺวา พาราณสึ คนฺตฺวา ฆราวาสํ คเหตฺวา อญฺเญหิ สิปฺเปหิ ชีวิตํ กปฺเปตุํ อสกฺโกนฺโต ธนุโกฏึ นิสฺสาย ชีวิตํ กปฺเปสฺสามีติ ลุทฺทกกมฺมํ กตฺวา ชีวิตํ กปฺเปสฺสามีติ พาราณสิโต นิกฺขมิตฺวา ปจฺจนฺตคามเก วสนฺโต ธนุกลาปสนฺนทฺโธ อรญฺญํ ปวิสิตฺวา นานามิเค มาเรตฺวา มํสวิกฺกเยน ชีวิตํ กปฺเปสิ ฯ โส เอกทิวสํ อรญฺเญ กิญฺจิ อลภิตฺวา อาคจฺฉนฺโต องฺคณปริยนฺเต ฐิตํ นิโคฺรธรุกฺขํ ทิสฺวา อปิ นาเมตฺถ กิญฺจิ ภเวยฺยาติ นิโคฺรธรุกฺขาภิมุโข ปายาสิ ฯ