สุปตฺตวคฺควณฺณนา

ภทฺรฆฏเภทกชาตกํ

สพฺพกามททํ กุมฺภนฺติ อิทํ สตฺถา เชตวเน วิหรนฺโต อนาถปิณฺฑิกสฺส ภาคิเนยฺยํ อารพฺภ กเถสิ ฯ

โส กิร มาตาปิตูนํ สนฺตกา จตฺตาลีสหิรญฺญโกฏิโย ปานพฺยสเนน นาเสตฺวา เสฏฺฐิสฺส สนฺติกํ อคมาสิ ฯ โสปิสฺส โวหารํ กโรหีติ สหสฺสํ อทาสิ ฯ ตมฺปิ นาเสตฺวา ปุน อคมาสิ ฯ ปุนสฺส ปญฺจสตานิ ทาเปสิ ฯ ตานิ นาเสตฺวา ปุน อาคตสฺส เทฺว ถูลสาฏเก ทาเปสิ ฯ เตปิ นาเสตฺวา อาคตํ คีวายํ คาหาเปตฺวา นีหราเปสิ ฯ โส อนาโถ หุตฺวา ปรกุฑฺฑํ นิสฺสาย กาลมกาสิ ฯ ตเมตํ กฑฺฒิตฺวา พหิ ฉฑฺเฑสุํ ฯ อนาถปิณฺฑิโก วิหารํ คนฺตฺวา สพฺพนฺตํ ภาคิเนยฺยสฺส ปวุตฺตึ ตถาคตสฺส อาโรเจสิ ฯ สตฺถา กึ ตฺวํ เอตํ สนฺตปฺเปสฺสสิ ยมหํ ปุพฺเพ สพฺพกามททํ กุมฺภํ ทตฺวาปิ สนฺตปฺเปตุํ นาสกฺขินฺติ วตฺวา เตน ยาจิโต อตีตํ อาหริ ฯ