จมฺมสาฏกชาตกํ

กลฺยาณรูโป วตายนฺติ อิทํ สตฺถา เชตวเน วิหรนฺโต จมฺมสาฏกํ นาม ปริพฺพาชกํ อารพฺภ กเถสิ ฯ

ตสฺส กิร จมฺมเมว นิวาสนญฺจ ปารุปนญฺจ ฯ โส เอกทิวสํ ปริพฺพาชการามา นิกฺขมิตฺวา สาวตฺถิยํ ภิกฺขาย จรนฺโต เอฬกานํ ยุชฺฌนฏฺฐานํ สมฺปาปุณิ ฯ เอฬโก ตํ ทิสฺวา ปหริตุกาโม โอสกฺกิ ฯ ปริพฺพาชโก เอสมฺหํ อปจิตึ ทสฺเสตีติ น ปฏิกฺกมิ ฯ เอฬโก เวเคน อาคนฺตฺวา ตํ อูรุมฺหิ ปหริตฺวา ปาเตสิ ฯ ตสฺส ตํ อสนฺตสฺส ปคฺคหณการณํ ภิกฺขุสงฺเฆ ปากฏํ อโหสิ ฯ ภิกฺขู ธมฺมสภายํ กถํ สมุฏฺฐาเปสุํ อาวุโส จมฺมสาฏกปริพฺพาชโก อสนฺตสมฺปคฺคหณํ กตฺวา วินาสมฺปตฺโตติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปส อสนฺตสมฺปคฺคหํ กตฺวา วินาสํ ปตฺโตติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เอกสฺมึ วาณิชกุเล นิพฺพตฺติตฺวา วณิชฺชํ กโรติ ฯ ตทา เอโก จมฺมสาฏกปริพฺพาชโก พาราณสิยํ ภิกฺขาย จรนฺโต เอฬกานํ ยุชฺฌนฏฺฐานํ ปตฺวา เอฬกํ โอสกฺกนฺตํ ทิสฺวา อปจิตึ เม กโรตีติ สญฺญาย อปฺปฏิกฺกมิตฺวา อิเมสํ เอตฺตกานํ มนุสฺสานํ อนฺตเร อยํ เอโก เอฬโก อมฺหากํ คุณํ ชานาตีติ อญฺชลึ ปคฺคยฺห ฐิตโกว ปฐมํ คาถมาห