อปฺปตฺตกาเล โจเทสิ, ตมฺปิ มยฺหํ น รุจฺจตีติ ฯ

ตตฺถ ตํ ตํ คามปติ พฺรูมีติ อมฺโภ คามเชฏฺฐก เตน การเณน ตํ วทามิ ฯ กทเร อปฺปสฺมึ ชีวิเตติ อมฺหากํ ชีวิตํ นาม กทรญฺเจว ถทฺธํ ลูขํ กสิรํ อปฺปญฺจ มนฺทํ ปริตฺตํ, ตสฺมึ โน เอวรูเป ชีวิเต วตฺตมาเน ฯ เทฺว มาเส สงฺครํ กตฺวา มํสํ ชรคฺควํ กิสนฺติ อมฺหากํ มํสํ คณฺหนฺตานํ ชรคฺควํ กิสํ ทุพฺพลํ ชรโคณํ ททมาโน ตฺวํ ทฺวีหิ มาเสหิ มูลํ ทาตพฺพนฺติ เอวํ เทฺว มาเส สงฺครํ ปริจฺเฉทํ กตฺวา ฯ อปฺปตฺตกาเล โจเทสีติ ตสฺมึ กาเล อสมฺปตฺเต อนฺตรา ว โจเทสิ ฯ ตมฺปิ มยฺหํ น รุจฺจตีติ ยา จายํ ปาปธมฺมา ทุสฺสีลา อนฺโตโกฏฺเฐ วีหีนํ นตฺถิภาวํ ชานมานา ว อชานนฺตี วิย หุตฺวา โกฏฺฐโมติณฺณา โกฏฺฐทฺวาเร ฐตฺวา น ทสฺสํ อิติ ภาสติ, ยญฺจ ตฺวมฺปิ อกาเล โจเทสิ, ตมฺปิ อุภยํ มม น รุจฺจตีติ ฯ

เอวํ โส กเถนฺโต กเถนฺโต ว คามโภชกํ จุฬาย คเหตฺวา กฑฺฒิตฺวา เคหมชฺเฌ ปาเตตฺวา คามโภชโกมฺหีติ ปรสฺส รกฺขิตโคปิเต ภณฺเฑ อปรชฺฌสีติ อาทีหิ ปริภาสิตฺวา โปเถตฺวา ทุพฺพลํ กตฺวา คีวายํ คเหตฺวา เคหา นิกฺกฑฺฒิตฺวา ตมฺปิ ทุฏฺฐอิตฺถึ เกเสสุ คเหตฺวา โกฏฺฐา โอตาเรตฺวา โปเถตฺวา สเจ ปุน เอวรูปํ กโรสิ, ชานิสฺสามีติ สนฺตชฺเชสิ ฯ ตโต ปฏฺฐาย คามโภชโก ตํ เคหํ โอโลเกตุํ น วิสหิ ฯ สาปิ ปาปา ปุนปิ อติจริตุํ นาสกฺขิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน อุกฺกณฺฐิตภิกฺขุ โสตาปตฺติผเล ปติฏฺฐหิ ฯ ตทา คามโภชกสฺส นิคฺคหณการโก คหปติ อหเมว อโหสีติ ฯ