อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ นิพฺพตฺเตตฺวา หิมวนฺตปฺปเทเส วาสํ กปฺเปสิ ฯ ตทา พาราณสิราชา อตฺตโน ปุตฺตสฺส พฺรหฺมทตฺตกุมารสฺส ปริวารสมฺปตฺตึ ทิสฺวา อุปฺปนฺนสงฺโก ปุตฺตํ รฏฺฐา ปพฺพาเชสิ ฯ โส อสิตาภุํ นาม อตฺตโน เทวึ อาทาย หิมวนฺตํ ปวิสิตฺวา มจฺฉมํสผลาผลานิ ขาทนฺโต ปณฺณสาลาย วาสํ กปฺเปสิ ฯ โส เอกํ กินฺนรึ ทิสฺวา ปฏิพทฺธจิตฺโต อิมํ ปชาปตึ กริสฺสามีติ อสิตาภุํ อคเณตฺวา ตสฺสานุปทํ อคมาสิ ฯ สา ตํ กินฺนรึ อนุพนฺธมานํ ทิสฺวา อยํ มํ อคเณตฺวา กินฺนรึ อนุพนฺธติ, กึ เม อิมินาติ วิรตฺตจิตฺตา หุตฺวา โพธิสตฺตํ อุปสงฺกมิตฺวา วนฺทิตฺวา อตฺตโน กสิณปริกมฺมํ กถาเปตฺวา กสิณํ โอโลเกนฺตี อภิญฺญา จ สมาปตฺติโย จ นิพฺพตฺเตตฺวา โพธิสตฺตํ วนฺทิตฺวา อาคนฺตฺวา อตฺตโน ปณฺณสาลทฺวาเร อฏฺฐาสิ ฯ พฺรหฺมทตฺโตปิ กินฺนรึ อนุพนฺธนฺโต วิจริตฺวา ตสฺสา คตมคฺคมฺปิ อทิสฺวา ฉินฺนาโส หุตฺวา ปณฺณสาลาภิมุโข อาคโต ฯ อสิตาภู ตํ อาคจฺฉนฺตํ ทิสฺวา เวหาสํ อพฺภุคฺคนฺตฺวา มณิวณฺเณ คคนตเล ฐิตา อยฺยปุตฺต ตํ นิสฺสาย มยา อิมํ ฌานสุขํ ลทฺธนฺติ วตฺวา ปฐมํ คาถมาห

ตฺวเมวทานิมกริ ยํ กาโม พฺยคมา ตยิ,

โสยํ อปฺปฏิสนฺธิโก ขรา ฉินฺนํว เรนุกนฺติ ๑-

ตตฺถ ตฺวเมวทานิมกรีติ อยฺยปุตฺต มํ ปหาย กินฺนรึ อนุพนฺธนฺโต ตฺวเมว อิทานิ อิทํ อกริ ฯ ยํ กาโม พฺยคมา ตยีติ ยํ มม ตยิ กาโม วิคโต วิกฺขมฺภนปฺปหาเนน ปหีโน, ยสฺส ปหีนตฺตา อหํ อิมํ วิเสสํ ปตฺตาติ ทีเปติ ฯ โสยํ อปฺปฏิสนฺธิโกติ โส ปน กาโม อิทานิ อปฺปฏิสนฺธิโก ชาโต น สกฺกา ปฏิสนฺธิตุํ ฯ ขรา ฉินฺนํว เรนุกนฺติ ขโร วุจฺจติ กกโจ, เรนุกํ วุจฺจติ หตฺถิทนฺโต ฯ ยถา กกจฉินฺโน หตฺถิทนฺโต อปฺปฏิสนฺธิโก ชาโต โหติ น ปุน ปุริมนเยน อลฺลียติ, เอวํ ปุน มยฺหํ ตยา สทฺธึ จิตฺตสฺส ฆฏนํ นาม นตฺถีติ ฯ