ธิรตฺถุ ตํ ยสลาภํ ธนลาภญฺจ พฺราหฺมณ

ยา วุตฺติ วินิปาเตน อธมฺมจรเณน วาติ ฯ

ตตฺถ ปริพฺพชาติ อิโต อญฺญตฺถ คจฺฉ ฯ มหาติ อยํ โลโก นาม มหา ฯ ปจนฺตญฺเญปีติ อิมสฺมึ ชมฺพูทีเป อญฺเญปิ ปาณิโน ปจนฺติ น อยเมเวโก ราชา ฯ ตสฺมา กุมฺภมิวาติ ปาสาโณ ฆฏํ วิย ฯ อิทํ วุตฺตํ โหติ ยํ ตฺวํ อญฺญตฺถ อคนฺตฺวา อิธ วสนฺโต อธมฺมํ อาจรสิ โส อธมฺโม เอวํ อาจริโต ปาสาโณ ฆฏํ วิย มา ตํ ภินฺทิ ฯ ธิรตฺถูติ คาถาย อยํ สงฺเขปตฺโถ พฺราหฺมณ โย เอส เอวํ ตว ยสลาโภ ธนลาโภ จ ธิรตฺถุ ตํ ครหาม มยํ กสฺมา ยสฺมายํ ตยา ลทฺธลาโภ อายตึ อปาเยสุ วินิปาตนเหตุนา สมฺปตฺติ จ อธมฺมจรเณน ชีวิตวุตฺติ นาม โหติ ยา เจสา วุตฺติ อิมินา อายตึ วินิปาเตน อิมินา อธมฺมจรเณน วา นิปฺปชฺชติ กึ ตาย เตน ตํ เอวํ วทามาติ ฯ

อถสฺส ธมฺมกถาย ราชา ปสีทิตฺวา โภ ปุริส กึชาติโกสีติ ปุจฺฉิ ฯ จณฺฑาโล อหํ เทวาติ ฯ โภ สเจ ชาติสมฺปนฺโน อภวิสฺส รชฺชนฺเต อทสฺสํ อิโต ปฏฺฐาย ปนาหํ ทิวา ราชา ภวิสฺสามิ ตฺวํ รตฺตึ ราชา โหหีติ อตฺตโน กณฺเฐ ปิลนฺธนํ ปุปฺผทามํ ตสฺส คีวายํ ปิลนฺธาเปตฺวา ตํ นครคุตฺติกํ อกาสิ ฯ อยํ นครคุตฺติกานํ กณฺเฐ รตฺตปุปฺผทามปิลนฺธนสฺส วํโส ฯ ตโต ปฏฺฐาย ราชา ตสฺโสวาเท ฐตฺวา อาจริยคารวํ กตฺวา นีเจ อาสเน นิสินฺโน มนฺเต อุคฺคณฺหิ ฯ