สพฺพสฺส สทิสี วาจา สพฺพํ สมฺม ททามิ เตติ ฯ

ตสฺสตฺโถ ยสฺส ปุริสสฺส คาเม สุขทุกฺเขสุ สห อยนโต สหายสงฺขาโต สขา นตฺถิ ตสฺส ตํ ฐานํ ยถา อมนุสฺสํ อรญฺญํ ตเถว โหติ อิติ อยํ ตว วาจา สพฺพสฺส สทิสีติ สพฺเพน อตฺตโน สนฺตเกน วิภเวน สทิสี ตสฺมา สพฺพเมว อิทํ มม สนฺตกํ มํสยานกํ ททามิ เตติ ฯ

เอวญฺจ ปน วตฺวา เอหิ สมฺม สพฺพเมวิทํ มํสยานกํ ตว เคหํ หริสฺสามีติ อาห ฯ เสฏฺฐิปุตฺโต เตน ยานกํ ปาชาเปนฺโต อตฺตโน ฆรํ คนฺตฺวา มํสํ โอตาราเปตฺวา ลุทฺทสฺส สกฺการสมฺมานํ กตฺวา ปุตฺตทารมฺปิ ตสฺส ปกฺโกสาเปตฺวา ลุทฺทกมฺมโต อปเนตฺวา อตฺตโน กุฏุมฺพมชฺเฌ วสาเปนฺโต เตน สทฺธึ อเภชฺชสหาโย หุตฺวา ยาวชีวํ สมคฺคสํวาสํ วสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ลุทฺทโก สารีปุตฺโต อโหสิ สพฺพมํสลาภี เสฏฺฐิปุตฺโต ปน อหเมวาติ ฯ