๕. มังสชาดก

มํสชาตกํ

ผรุสา วต เต วาจาติ อิทํ สตฺถา เชตวเน วิหรนฺโต สารีปุตฺตตฺเถเรน ปีตวิเรจนานํ ทินฺนรสปิณฺฑปาตํ อารพฺภ กเถสิ ฯ

ตทา กิร เชตวเน เอกจฺเจ ภิกฺขู สิเนหวิเรจนํ ปิวึสุ ฯ เตสํ รสปิณฺฑปาเตน อตฺโถ โหติ ฯ คิลานุปฏฺฐากา รสภตฺตํ อาหริสฺสามาติ สาวตฺถิยํ ปวิสิตฺวา โอทนียฆรวีถิยํ ปิณฺฑาย จริตฺวาปิ รสภตฺตํ อลภิตฺวา นิวตฺตึสุ ฯ เถโร ทิวาตรํ ปิณฺฑาย ปวิสมาโน เต ภิกฺขู ทิสฺวา กึ อาวุโส อติปเคว นิวตฺติตฺถาติ ปุจฺฉิ ฯ เต ตมตฺถํ อาโรเจสุํ ฯ เถโร เตนหิ เอถาติ เต คเหตฺวา ตเมว วีถึ อคมาสิ ฯ มนุสฺสา ปูเรตฺวา ปูเรตฺวา รสภตฺตํ อทํสุ ฯ คิลานุปฏฺฐากา วิหารํ อาหริตฺวา คิลานานํ อทํสุ ฯ เต รสํ ปริภุญฺชึสุ ฯ อเถกทิวสํ ภิกฺขู ธมฺมสภายํ กถํ สมุฏฺฐาเปสุํ อาวุโส เถโร กิร ปีตวิเรจนานํ อุปฏฺฐาเก รสภตฺตํ อลภิตฺวา นิกฺขมนฺเต คเหตฺวา โอทนียฆรวีถิยํ จริตฺวา พหุรสปิณฺฑปาตํ เปเสสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว สารีปุตฺโต วรมํสํ ลภิ ปุพฺเพปิ มุทุวาจา ปิยวจนํ วตฺตุํ เฉกา ปณฺฑิตา ลภึสูติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เสฏฺฐิปุตฺโต อโหสิ ฯ อเถกทิวสํ เอโก มิคลุทฺทโก พหุมํสํ ลภิตฺวา ยานกํ ปูเรตฺวา วิกฺกีณิสฺสามีติ นครํ อาคจฺฉติ ฯ ตทา พาราณสีวาสิกา จตฺตาโร เสฏฺฐิปุตฺตา นครา นิกฺขมิตฺวา เอกสฺมึ มคฺคสภาเค ฐาเน กิญฺจิ ทิฏฺฐํ สุตํ สมุลฺลปนฺตา นิสีทึสุ ฯ เอเตสุ เอโก เสฏฺฐิปุตฺโต ตํ มํสยานกํ ทิสฺวา เอตํ ลุทฺทกํ มํสขณฺฑํ อาหราเปมีติ ปุจฺฉิ ฯ คจฺฉ อาหราเปหีติ ฯ โส ตํ อุปสงฺกมิตฺวา อเร ลุทฺทก เทหิ เม มํสขณฺฑนฺติ อาห ฯ ลุทฺทโก ปรํ กิญฺจิ ยาจนฺเตน นาม ปิยวจเนน ภวิตพฺพํ ตยา กถิตวาจาย อนุจฺฉวิกํ มํสขณฺฑํ ลภิสฺสสีติ วตฺวา ปฐมํ คาถมาห

ผรุสา วต เต วาจา มํสํ ยาจนโก อสิ

กิโลมสทิสี วาจา กิโลมํ สมฺม ททามิ เตติ ฯ

ตตฺถ กิโลมสทิสีติ ผรุสตาย กิโลมสทิสี ฯ กิโลมํ สมฺม ททามิ เตติ หนฺท คณฺห อิทนฺเต วาจาย สทิสํ กิโลมํ ทมฺมีติ นีรสํ กิโลมขณฺฑํ อุกฺขิปิตฺวา อทาสิ ฯ

อถ นํ อปโร เสฏฺฐิปุตฺโต กินฺติ วตฺวา ยาจสีติ ปุจฺฉิ ฯ อเรติ วตฺวาติ ฯ โส อหมฺปิ นํ ยาจิสฺสามีติ วตฺวา คนฺตฺวา เชฏฺฐกภาติก มํสขณฺฑํ เม เทหีติ อาห ฯ อิตโร ตว วจนสฺส อนุจฺฉวิกํ ลภิสฺสสีติ วตฺวา ทุติยํ คาถมาห

องฺคเมตํ มนุสฺสานํ ภาตา โลเก ปวุจฺจติ

องฺคสฺส สทิสี วาจา องฺคํ สมฺม ททามิ เตติ ฯ

ตสฺสตฺโถ อิมสฺมึ โลเก มนุสฺสานํ องฺคสทิสตฺตา องฺคเมตํ ยทิทํ ภาตา ภคินีติ ตสฺมา ตเวสา องฺคสทิสี วาจาติ เอติสฺสา อนุจฺฉวิกํ องฺคเมว ททามิ เตติ ฯ

เอวญฺจ ปน วตฺวา องฺคมํสํ อุกฺขิปิตฺวา อทาสิ ฯ ตํ อปโร เสฏฺฐิปุตฺโต กินฺติ วตฺวา ยาจสีติ ปุจฺฉิ ฯ ภาติกาติ วตฺวาติ ฯ โส อหมฺปิ นํ ยาจิสฺสามีติ วตฺวา คนฺตฺวา ตาต มํสขณฺฑํ เม เทหีติ อาห ฯ ลุทฺโท ตว วจนานุรูปํ ลจฺฉสีติ วตฺวา ตติยํ คาถมาห

ตาตาติ ปุตฺโต วทมาโน กมฺเปติ หทยํ ปิตุ

หทยสฺส สทิสี วาจา หทยํ สมฺม ททามิ เตติ ฯ

เอวญฺจ ปน วตฺวา หทยมํเสน สทฺธึ มธุรมํสํ อุกฺขิปิตฺวา อทาสิ ฯ ตํ จตุตฺโถ เสฏฺฐิปุตฺโต กินฺติ วตฺวา ยาจสีติ ปุจฺฉิ ฯ โส ตาตาติ วตฺวาติ ฯ โส อหมฺปิ นํ ยาจิสฺสามีติ วตฺวา คนฺตฺวา สหาย มํสขณฺฑํ เม เทหีติ อาห ฯ ลุทฺโท ตว วจนานุรูปํ ลภิสฺสสีติ วตฺวา จตุตฺถํ คาถมาห

ยสฺส คาเม สขา นตฺถิ ยถารญฺญํ ตเถว ตํ

สพฺพสฺส สทิสี วาจา สพฺพํ สมฺม ททามิ เตติ ฯ

ตสฺสตฺโถ ยสฺส ปุริสสฺส คาเม สุขทุกฺเขสุ สห อยนโต สหายสงฺขาโต สขา นตฺถิ ตสฺส ตํ ฐานํ ยถา อมนุสฺสํ อรญฺญํ ตเถว โหติ อิติ อยํ ตว วาจา สพฺพสฺส สทิสีติ สพฺเพน อตฺตโน สนฺตเกน วิภเวน สทิสี ตสฺมา สพฺพเมว อิทํ มม สนฺตกํ มํสยานกํ ททามิ เตติ ฯ

เอวญฺจ ปน วตฺวา เอหิ สมฺม สพฺพเมวิทํ มํสยานกํ ตว เคหํ หริสฺสามีติ อาห ฯ เสฏฺฐิปุตฺโต เตน ยานกํ ปาชาเปนฺโต อตฺตโน ฆรํ คนฺตฺวา มํสํ โอตาราเปตฺวา ลุทฺทสฺส สกฺการสมฺมานํ กตฺวา ปุตฺตทารมฺปิ ตสฺส ปกฺโกสาเปตฺวา ลุทฺทกมฺมโต อปเนตฺวา อตฺตโน กุฏุมฺพมชฺเฌ วสาเปนฺโต เตน สทฺธึ อเภชฺชสหาโย หุตฺวา ยาวชีวํ สมคฺคสํวาสํ วสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ลุทฺทโก สารีปุตฺโต อโหสิ สพฺพมํสลาภี เสฏฺฐิปุตฺโต ปน อหเมวาติ ฯ

มํสชาตกํ ปญฺจมํ