วาติ จายํ ตโต คนฺโธ ยตฺถ เม วสตี ปิยา

ทูเร อิโต หิ กากาติ ยตฺถ เม นิรโต มโนติ ฯ

ตตฺถ คนฺโธติ ตสฺสา ทิพฺพคนฺธวิลิตฺตาย สรีรคนฺโธ ฯ ยตฺถ เมติ ยตฺถ สุปณฺณภวเน มม ปิยา วสติ ตโต อิมินา สทฺธึ กตกายสํสคฺคาย ตสฺสา อิมสฺส กาเยน สทฺธึ อาคโต คนฺโธ วายตีติ อธิปฺปาโย ฯ ทูเร อิโตติ อิมมฺหา ฐานา ทูเร ฯ หิกาโร นิปาตมตฺโต ฯ กากาตีติ กากาติเทวี ฯ ยตฺถ เมติ ยสฺสา อุปริ เม มโน นิรโต รตฺโต ฯ

ตํ สุตฺวา สุปณฺณราชา ทุติยํ คาถมาห