อาวุโสติ วตฺวา สารีปุตฺตตฺเถรํ อุปสงฺกมิตฺวา อาวุโส เอส วิฆาสาโท ตุมฺหากํ สนฺติเก กิญฺจิ กเถสีติ ปุจฺฉิ ฯ อาวุโส มยาปิ สทฺธึ กเถสิ อิมํ นีหริตุํ วฏฺฏตีติ ฯ สาธุ อาวุโส นีหราติ วุตฺเต เถโร มา อิธ วสีติ อจฺฉรํ ปหริตฺวา ตํ นีหริ ฯ เต อุโภปิ สมคฺคสํวาสํ วสิตฺวา สตฺถุ สนฺติกํ คนฺตฺวา วนฺทิตฺวา นิสีทึสุ ฯ สตฺถา ปฏิสนฺถารํ กตฺวา สุเขน วสฺสํ วสิตฺถาติ ปุจฺฉิ ฯ ภนฺเต เอโก วิฆาสาโท อมฺเห ภินฺทิตุกาโม หุตฺวา ภินฺทิตุํ อสกฺโกนฺโต ปลายีติ วุตฺเต นโข โส สารีปุตฺต อิทาเนว ปุพฺเพเปส ตุมฺเห ภินฺทิสฺสามีติ ภินฺทิตุํ อสกฺโกนฺโต ปลายีติ วตฺวา เตหิ ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อรญฺเญ รุกฺขเทวตา อโหสิ ฯ ตทา สีโห จ พฺยคฺโฆ จ อรญฺเญ ปพฺพตคุหายํ วสนฺติ ฯ เอโก สิคาโล เต อุปฏฺฐหนฺโต เตสํ วิฆาสํ ขาทิตฺวา มหากาโย หุตฺวา เอกทิวสํ จินฺเตสิ มยา สีหพฺยคฺฆานํ มํสํ น ขาทิตปุพฺพํ มยา อิเม เทฺว ชเน ภินฺทิตุํ วฏฺฏติ ตโต เตสํ กลหํ กตฺวา มตานํ มํสํ ขาทิสฺสามีติ ฯ โส สีหํ อุปสงฺกมิตฺวา กึ สามิ ตุมฺหากํ พฺยคฺเฆน สทฺธึ กิญฺจิ เวรํ อตฺถีติ ปุจฺฉิ ฯ กึ ปน สมฺมาติ ฯ เอส ภนฺเต มม อาคตกาเล สีโห นาม สรีรวณฺเณน วา อาโรหปริณาเหน วา ชาติพลวิริเยหิ วา มม กลภาคมฺปิ น ปาปุณาตีติ ตุมฺหากํ อคุณเมว กเถสีติ ฯ อถ นํ สีโห คจฺฉ ตฺวํ น โส เอวํ กเถสฺสตีติ อาห ฯ พฺยคฺฆมฺปิ อุปสงฺกมิตฺวา เอเตเนว อุปาเยน กเถสิ ฯ ตํ สุตฺวา พฺยคฺโฆ สีหํ อุปสงฺกมิตฺวา สมฺม ตฺวํ กิร อิทญฺจิทญฺจ วเทสีติ ปุจฺฉนฺโต ปฐมํ คาถมาห

วณฺณาโรเหน ชาติยา พลนิกฺกมเนน จ

สุพาหุ น มยา เสยฺโย สุทาโฒ อิติ ภาสสีติ ฯ