เสสคาถายปิ อยํ สงฺเขปตฺโถ มหาราช เย ปุริสา อยํ มํ อกฺโกสิ อยํ มํ ปหริ อยํ มํ อชินิ อยํ มม สนฺตกํ อหาสีติ เอวํ เวรํ อุปนยฺหนฺติ พนฺธิตฺวา วิย หทเย ฐเปนฺติ เตสํ เวรํ น วูปสมฺมติ เย ปเนตํ น อุปนยฺหนฺติ หทเย น ฐเปนฺติ เตสํ วูปสมฺมติ เวรานิ หิ น กทาจิ เวเรน สมฺมนฺติ อเวเรเนว ปน สมฺมนฺติ เอส ธมฺโม สนนฺตโนติ โปราณโก ธมฺโม จิรกาลปฺปวตฺโต สภาโวติ ฯ

เอวญฺจปน วตฺวา โพธิสตฺโต อหํ มหาราช ตยิ น ทุพฺภามิ ตฺวํ ปน มํ มาเรหีติ ตสฺส หตฺเถ อสึ ฐเปสิ ฯ ราชาปิ นาหํ ตยิ ทุพฺภามีติ สปถํ กตฺวา เตน สทฺธึ นครํ คนฺตฺวา ตํ อมจฺจานํ ทสฺเสตฺวา อยํ ภเณ โกสลรญฺโญ ปุตฺโต ทีฆาวุกุมาโร อิมินาปิ มยฺหํ ชีวิตํ ทินฺนํ น ลพฺภา อิมํ กิญฺจิ กาตุนฺติ วตฺวา อตฺตโน ธีตรํ ทตฺวา ปิตุ สนฺตเก รชฺเช ปติฏฺฐาเปสิ ฯ ตโต ปฏฺฐาย อุโภปิ สมคฺคา สมฺโมทมานา รชฺชํ กาเรสุํ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา มาตาปิตโร มหาราชกุลานิ อเหสุํ ทีฆาวุกุมาโร ปน อหเมวาติ ฯ

ทีฆีติโกสลชาตกํ ปฐมํ