ตตฺถ ปฐมคาถาย อตฺโถ ยตฺถ สนฺตานํ ปณฺฑิตานํ สีลสมฺปนฺนานํ มานนสฺส อภาเวน อมานนา จ อวมานนา จ อวมานวเสน วิมานนา วา หีนานํ วา ทุสฺสีลานํ วา สมานนา วา สิยา ตตฺถ น วเส น วเสยฺย ฯ ปูชิยาติ เอเต เอตฺถ เอกสทิสาย ปูชาย ปูชนียา โหนฺติ สมกํ สกฺการํ ลภนฺติ ฯ หีนมุกฺกฏฺฐมชฺฌิเมติ ชาติโคตฺตกุลปฺปเทสสีลาจารญาณาทีหิ หีเน จ มชฺฌิเม จ อุกฺกฏฺเฐ จ อยํ น วิภชติ ฯ หนฺทาติ อุปสคฺคตฺเถ นิปาโต ฯ ชหามเสติ ปริจฺจชาม ฯ

เอวญฺจ ปน วตฺวา อุโภปิ เต หํสา อุปฺปติตฺวา จิตฺตกูฏเมว คตา ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน โส ภิกฺขุ โสตาปตฺติผเล ปติฏฺฐหิ ฯ ตทา กนิฏฺฐหํโส อานนฺโท อโหสิ เชฏฺฐกหํโส ปน อหเมวาติ ฯ

เนรุชาตกํ จตุตฺถํ ฯ