น เว ยาจนฺติ สปฺปญฺญา ธีโร เวทิตุมรหติ

อุทฺทิสฺส อริยา ติฏฺฐนฺติ เอสา อริยาน ยาจนาติ ฯ

ตตฺถ สปฺปญฺญาติ พุทฺธา จ พุทฺธสาวกา จ โพธิยา ปฏิปตฺตึ ปฏิปนฺนา อิสิปพฺพชฺชํ ปพฺพชิตา โพธิสตฺตา จ สพฺเพปิ สปฺปญฺญา จ สุสีลา จ เต เอวรูปา สปฺปญฺญา อมฺหากํ อิทญฺจิทญฺจ เทถาติ น ยาจนฺติ ฯ ธีโร เวทิตุมรหตีติ อุปฏฺฐาโก ปน ธีโร ปณฺฑิโต คิลานกาเล จ อคิลานกาเล จ เยน เยนตฺโถ ตํ สพฺพํ สามํเยว เวทิตุํ ชานิตุมรหติ ฯ อุทฺทิสฺส อริยา ติฏฺฐนฺตีติ อริยา ปน วาจํ อภินฺทิตฺวา เยนตฺถิกา โหนฺติ อุทฺทิสฺส เกวลํ ภิกฺขาจารวตฺเตน ติฏฺฐนฺติเยว เนว กายงฺคํ วาจงฺคํ โกเปนฺติ กายวิการํ ทสฺเสตฺวา นิมิตฺตํ กโรนฺตา หิ กายงฺคํ โกเปนฺติ นาม วจีเภทํ กโรนฺตา วาจงฺคํ โกเปนฺติ นาม ตทุภยํ อกตฺวา พุทฺธาทโย อริยา ติฏฺฐนฺติ ฯ เอสา อริยาน ยาจนาติ เอสา กายงฺคํ วาจงฺคํ อโกเปตฺวา ภิกฺขาย ติฏฺฐนา อริยานํ ยาจนา นาม ฯ

ราชา โพธิสตฺตสฺส วจนํ สุตฺวา ภนฺเต ยทิ สปฺปญฺโญ อุปฏฺฐาโก อตฺตนาว ญตฺวา กุลุปกสฺส ทาตพฺพํ เทติ อหํปิ ตุมฺหากํ อิทญฺจิทญฺจ ทมฺมีติ วทนฺโต สตฺตมํ คาถมาห