ตตฺถ ฆโนติ ฆนสรีโร ฯ สญฺชาตโรหิโตติ อุตฺตตฺตสุวณฺณํ วิย สุฏฺฐุชาตโลหิตวณฺโณ ฯ ปาฏีนนฺติ ปาฏีนนฺนาม ปาสาณมจฺฉํ ฯ ปาวุสนฺติ มหามุขมจฺฉํ ฯ ราวุสนฺติปิ ปาโฐ ฯ พลชฺชนฺติ พลชฺชมจฺฉญฺจ ฯ มุญฺชโรหิตนฺติ มุญฺชมจฺฉญฺจ โรหิตมจฺฉญฺจ ฯ เอวรูปํ โภชนํ มญฺเญ ภุญฺชสีติ ปุจฺฉติ ฯ

จกฺกวาโก ตสฺส วจนํ ปฏิกฺขิปนฺโต ตติยํ คาถมาห

น จาหเมตํ ภุญฺชามิ ชงฺคลานูทกานิ วา

อญฺญตฺร เสวาลา ปณกา เอตํ เม สมฺม โภชนนฺติ ฯ