สเจ มุญฺเจ เปจฺจ มุญฺเจ มุจฺจมาโน หิ พชฺฌสิ

น เหวํ ธีรา มุจฺจนฺติ มุตฺติ พาลสฺส พนฺธนนฺติ ฯ

ตตฺถ สเจ มุญฺเจ เปจฺจ มุญฺเจติ โภ ปุริส ตฺวํ สเจ มุญฺเจ ยทิ มุจฺจิตุกาโมสิ เปจฺจ มุญฺเจ ยถา ปรโลเกน พชฺฌสิ เอวํ มุญฺจ ฯ มุจฺจมาโน หิ พชฺฌสีติ ยถา ปน ตฺวํ ปาณํ วธิตฺวา มุจฺจิตุํ อิจฺฉสิ เอวํ มุจฺจมาโน หิ ปาเปน กมฺเมน พชฺฌสิ ฯ กสฺมา ฯ น เหวํ ธีรา มุจฺจนฺตีติ เย ปน ปณฺฑิตา ปุริสา เต เอวํ ปฏิสฺสวโต น มุจฺจนฺตีติ ฯ กึการณา เอวรูปา หิ มุตฺติ พาลสฺส พนฺธนํ เอสา ปาณาติปาตํ กตฺวา มุตฺติ นาม พาลสฺส พนฺธนเมว โหตีติ ธมฺมํ เทเสสิ ฯ

ตโต ปฏฺฐาย มนุสฺสา เอวรูปา ปาณาติปาตกมฺมา วิรตา ธมฺมํ จริตฺวา เทวนครํ ปูรยึสุ ฯ