๙. อายาจิตภัตตชาดก

๙ อายาจิตภตฺตชาตกํ

สเจ มุญฺเจติ อิทํ สตฺถา เชตวเน วิหรนฺโต เทวตานํ อายาจนพลิกมฺมํ อารพฺภ กเถสิ ฯ

ตทา กิร มนุสฺสา วณิชฺชาย คจฺฉนฺตา ปาเณ วธิตฺวา เทวตานํ พลิกมฺมํ กตฺวา มยํ อนนฺตราเยน อตฺถสิทฺธึ ปตฺวา อาคนฺตฺวา ปุน ตุมฺหากํ พลิกมฺมํ กริสฺสามาติ อายาจิตฺวา คจฺฉนฺติ ฯ ตตฺถ อนนฺตราเยน อตฺถสิทฺธึ ปตฺวา อาคนฺตฺวา เทวตานุภาเวน อิทํ ชาตนฺติ มญฺญมานา พหู ปาเณ วธิตฺวา อายาจนโต มุจฺจิตุํ พลิกมฺมํ กโรนฺติ ฯ ตํ ทิสฺวา ภิกฺขู อตฺถิ นุ โข ภนฺเต เอตฺถ อตฺโถติ ภควนฺตํ ปุจฺฉึสุ ฯ ภควา อตีตํ อาหริ ฯ

อตีเต กาสิรฏฺเฐ เอกสฺมึ คามเก เอโก กุฏุมฺพิโก คามทฺวาเร ฐิเต นิโคฺรธรุกฺเข อธิวตฺถาย เทวตาย พลิกมฺมํ ปฏิชานิตฺวา อนนฺตราเยน อาคนฺตฺวา พหู ปาเณ วธิตฺวา อายาจนโต มุจฺจิสฺสามีติ รุกฺขมูลํ คโต ฯ รุกฺขเทวตา ขนฺธวิฏเป ฐตฺวา อิทํ คาถมาห

สเจ มุญฺเจ เปจฺจ มุญฺเจ มุจฺจมาโน หิ พชฺฌสิ

น เหวํ ธีรา มุจฺจนฺติ มุตฺติ พาลสฺส พนฺธนนฺติ ฯ

ตตฺถ สเจ มุญฺเจ เปจฺจ มุญฺเจติ โภ ปุริส ตฺวํ สเจ มุญฺเจ ยทิ มุจฺจิตุกาโมสิ เปจฺจ มุญฺเจ ยถา ปรโลเกน พชฺฌสิ เอวํ มุญฺจ ฯ มุจฺจมาโน หิ พชฺฌสีติ ยถา ปน ตฺวํ ปาณํ วธิตฺวา มุจฺจิตุํ อิจฺฉสิ เอวํ มุจฺจมาโน หิ ปาเปน กมฺเมน พชฺฌสิ ฯ กสฺมา ฯ น เหวํ ธีรา มุจฺจนฺตีติ เย ปน ปณฺฑิตา ปุริสา เต เอวํ ปฏิสฺสวโต น มุจฺจนฺตีติ ฯ กึการณา เอวรูปา หิ มุตฺติ พาลสฺส พนฺธนํ เอสา ปาณาติปาตํ กตฺวา มุตฺติ นาม พาลสฺส พนฺธนเมว โหตีติ ธมฺมํ เทเสสิ ฯ

ตโต ปฏฺฐาย มนุสฺสา เอวรูปา ปาณาติปาตกมฺมา วิรตา ธมฺมํ จริตฺวา เทวนครํ ปูรยึสุ ฯ

สตฺถา อิทํ ธมฺมเทสนํ อาหริตฺวา อนุสนฺธึ ฆเฏตฺวา ชาตกํ สโมธาเนสิ อหํ เตน สมเยน รุกฺขเทวตา อโหสินฺติ ฯ

อายาจิตชาตกํ นวมํ ฯ