น เว อนตฺถกุสเลน อตฺถจริยา สุขาวหา

หาเปติ อตฺถํ ทุมฺเมโธ โกณฺฑญฺโญ วารุณึ ยถาติ ฯ

ตตฺถ โกณฺฑญฺโญ วารุณึ ยถาติ ยถา อยํ โกณฺฑญฺญนามโก อนฺเตวาสิโก อตฺถํ กริสฺสามีติ โลณํ ปกฺขิปิตฺวา วารุณึ หาเปสิ ปริหาเปสิ วินาเสสิ เอวํ สพฺโพปิ อนตฺถกุสโล อตฺถํ หาเปตีติ ฯ โพธิสตฺโต อิมาย คาถาย ธมฺมํ เทเสสิ ฯ

สตฺถาปิ น เอโส คหปติ อิทาเนว วารุณิทูสโก ปุพฺเพปิ วารุณิทูสโกเยวาติ วตฺวา อนุสนฺธึ ฆเฏตฺวา ชาตกํ สโมธาเนสิ ตทา วารุณิทูสโก วารุณิทูสโกว อโหสิ พาราณสีเสฏฺฐี ปน อหเมวาติ ฯ