ตเถว ปุณฺณปาติโย อญฺญายํ วตฺตเต กถา

อาการเกน ชานามิ เนวายํ ภทฺทกา สุราติ ฯ

ตตฺถ ตเถวาติ ยถา มยา คมนกาเล ทิฏฺฐา อิทานิปิ อิมา สุราจาฏิโย ตเถว ปุณฺณา ฯ อญฺญายํ วตฺตเต กถาติ ยา อยํ ตุมฺหากํ สุราวณฺณนกถา วตฺตติ สา อญฺญาว อภูตา ตุจฺฉา ยทิ หิ เอสา สุรา มนาปา อสฺส ตุมฺเห ปิเวยฺยาถ อุปฑฺฒจาฏิโย อวสิสฺเสยฺยุํ ตุมฺหากํ ปน เอเกนาปิ สุรา น ปีตา ฯ อาการเกน ชานามีติ ตสฺมา อิมินา การเณน ชานามิ ฯ เนวายํ ภทฺทกา สุราติ เนว อยํ ภทฺทกา สุรา วิสสํโยชิตาย ภวิตพฺพนฺติ ฯ

ธุตฺเต นิคฺคเหตฺวา ยถา ปุน เอวรูปํ น กโรนฺติ ตถา เต ตชฺเชตฺวา วิสฺสชฺเชสิ ฯ โส ยาวชีวํ ทานาทีนิ ปุญฺญานิ กริตฺวา ยถากมฺมงฺคโต ฯ